Sheteldikter Qazaqstannyń týrıstik aımaqtaryn jarnamalaý shyǵyndaryn óteıdi
ASTANA. QazAqparat - Qazaqstannyń týrıstik jerlerin jarnamalaýǵa qajetti qarjy sheteldik týrısterge salynatyn alymnyń esebinen óndiriledi. Bul týraly búgin «Atameken» UKP alańynda Qazaqstanda týrızmdi damytýdyń memlekettik baǵdarlamasynyń jobasyn tanystyrý kezinde QR Mádenıet jáne sport vıtse-mınıstriniń keńesshisi Erkebulan Hasenov málim etti, dep habarlaıdy QazAqparat.
«Ókinishke qaraı, marketıng pen ónimdi alǵa jyljytýda ózge elderden aıtarlyqtaı qalys kele jatyrmyz. Búginde álemde Qyrǵyzstan, Ózbekstan, Ázerbaıjan, Mońǵolııa jaıynda kóp biledi, sondaı-aq Grýzııa bul baǵytta eleýli ilgeriledi. Atap aıtqanda, bul elderde týrızm máselesin sheshýge belsendi túrde kirisip, nasıhattaý sharalaryna qajetti qarjyny bólip jatyr», - dedi E. Hasenov.
Onyń sózine qaraǵanda, Grýzııada saladaǵy jarnamaǵa qomaqty somada qarjy jumsalýda. Sonymen qatar, týrıstik múmkindikterin nasıhattaýǵa Chehııa men BAÁ qyrýar qarjy baǵyttaýda.
«Sondyqtan da osy salada qarjylandyrýdy arttyrmasaq, týrısterdi tartýda tıisti kórsetkishterge qol jetkizý qıyndaý bolady. Atalǵan elderdiń marketıngindegi ortasha bıýdjetterine jaqyndaý úshin biz aǵymdaǵy bıýdjetti jylyna 1 mln dollardan 6-7 mln dollarǵa deıin arttyrýymyz kerek», - dedi E. Hasenov.
Sonymen qatar ol bıýdjetke túsetin júktemeni azaıtýdyń jolyna toqtaldy. Ol úshin Bed Tax júıesin engizý usynylýda. Bul turǵyda sheteldikterge týrıstik alymdy engizý eskerilgen, ıaǵnı olar ornalasqan jerlerinde tıisti tólem jasaıtyn bolady.
«Atalǵan alym maqsatty bolady jáne salyqpen qamtylmaıdy. Alym júıesine jaýapty ákimshi retinde «Kazakh Tourism» kompanııasyn taǵaıyndaý usynyldy. Týrıstik alym marketıng pen jarnamaǵa baǵyttalady. Bul óz kezeginde memlekettik bıýdjetke júktemeni azaıtady», - dedi vedomstvo ókili.
Bastapqy kezeńde sheteldik azamattarǵa bir qonǵan túnge alym eki dollar somasynda belgilenbek. Osy tetik arqyly jylyna 4-5 mln dollar kóleminde qosymsha túsim bolady dep josparlanýda.
