Sheteldikter Qazaqstannyń bes aýmaǵynda zańsyz qarjy pıramıdasyn uıymdastyrǵan

NUR-SULTAN. QazAqparat - QR Qarjy mınıstrligi Qarjy monıtorıngi komıtetiniń Aqtóbe oblysy boıynsha Ekonomıkalyq tergeý departamenti shetel azamattarynyń qarjy pıramıdasyn uıymdastyrý deregin anyqtady, dep habarlaıdy QazAqparat departamenttiń baspasóz qyzmetiniń málimetterine silteme jasap.

Baspasóz qyzmetiniń derekterine qaraǵanda, qarjy pıramıdasyn uıymdastyrýshylar ózderin «Unique finance» shetel kompanııasynyń ókilderi retinde tanystyryp, turǵyndarǵa qarajattaryn «Pepsi», «Nike», «Microsoft», «Ford», «BMW» sekildi halyqaralyq iri kompanııalardyń baǵaly qaǵazdaryna ınvestıtsııalaýdy usynǵandyǵy belgili boldy.

Salymshylarǵa aı saıyn jalpy salǵan somalarynyń 6%-y kóleminde, sondaı-aq, jańadan tirkelgen seriktestiń salym somasynan 5% paıda alatyny ýáde etilgen. Osy kompanııaǵa eń tómengi salym 1000 AQSh dollaryn quraǵanyn atap ótken jón.

Biraq shyndyǵynda pıramıda uıymdastyrýshylary salymshylarǵa «brend» kompanııalardyń jalǵan aktsııalaryn usynyp, olardyń qarjysyn ıelenip otyrǵan. Olar mundaı zańsyz qyzmetti Almaty, Nur-Sultan, Shymkent, Aqtóbe jáne Oral qalalarynda júrgizgen.

Qazirgi tańda atalǵan derek boıynsha QR QK 217-b. 2-b. sáıkes sotqa deıingi tergeý amaldary júrgizilýde.

«Qurmetti azamattar! Aqtóbe oblysy boıynsha ETD eger «Unique finance» kompanııasyna aqsha qarajatyn salǵan bolsańyz, resmı aryzben júginý qajettigin habarlaıdy»,-delingen QR QM QMK Baspasóz qyzmeti.