Sheteldikter qazaqstandyq uıymdarǵa jylyna 5 mlrd teńge qarajat bóledi
«Donorlyq - eń mańyzdy baǵyttardyń biri. Qazaqstan - qazirgi tańda Búkilálemdik banktiń baǵalaýy boıynsha JІÓ-si ortasha deńgeıden joǵary elderdiń biri. Osyǵan baılanysty bizdiń memleket netto-donor bolyp tabylady. Demek, bólingen donorlyq kómektiń deńgeıi alynatyn kórsetkishten asyp tur. 2012 jyldan bastap bizdiń el reıtıngte 28 orynǵa kóterildi. Qaıyrymdylyq kómek kórsetý salasynda ıaǵnı aıtarlyqtaı ilgerileýshilik bar. Málimetter bazasyndaǵy ÚEU jobalyq jumysynyń taldaý jumystary mynany kórsetip otyr: jyl saıyn sheteldikter shamamen ÚEU-lardy 5 mlrd teńgege qarjylandyryp otyr», - dedi mınıstr búgingi VIII Azamattyq forýmda.
Onyń aıtýyna qaraǵanda, 200-ge tarta ÚEU-ǵa shetelderden qarjy bólinedi. Ol qarajattyń 70 paıyzy - AQSh pen halyqaralyq uıymdarǵa tıesili.
«Álemdik trend orta klassty kómek kórsetýge tartýǵa saıady. Álemdik baıandamalarǵa sensek, 2030 jylǵa qaraı ol klassqa shamamen 2,5 mlrd adamdaı aralasatyn bolady. Eger orta klasstyń árbir ókili óz tabysynyń 0,5 paıyzyn qaıyrymdylyqqa jumsasa, onda álem azamattyq qoǵamǵa shamamen 319 mlrd AQSh dollaryn aýdarar edi. Qazirgi tańda mınıstrlik Úkimettiń tapsyrmasymen qaıyrymdylyq pen donorlyqqa qatysty jańa zań jobasyn ázirlep jatyr. Mundaǵy negizgi maqsat - qoǵamdyq erikti donorlyq jolyna degen kedergilerdi alyp tastaý bolyp tabylady. Bul baǵyt azamattyq mádenıettiń bir bóligi retinde qalyptasýy kerek», - deıdi ol.
Mınıstr, sonymen birge, Qazaqstanda búgingi tańda 53 halyqaralyq uıym, 77 sheteldik úkimettik emes uıym men qor jumys istep turǵanyn tilge tıek etti.
«Negizgi tendentsııa: Qazaqstandaǵy kómektiń damýyn qarjylandyrý deńgeıi tómendep keledi, alaıda donorlardy qarjylandyrý artty. Buǵan donorlyq resýrstardyń belgili bir kórsetkishterge jetýdi kózdeýi sebep bolýda. Qazaqstan qazirgi tańda búkil Ortalyq Azııadaǵy metodologııalyq ortalyq bola alary aıqyn. Qazaqstan sheteldik donorlyq uıymdarmen birlese jumys isteýge daıyn. Bizge memleket, donor men qazaqstandyq bıznes sekildi úsh taraptan úshjaqty yntymaqtastyq kerek», - deıdi ol.
Eske sala ketsek, búgin Astanada «Azamattyq qoǵam jáne memleket: Dıalog. Seriktestik. Senim» taqyrybynda VIII azamattyq forým ótti. Shara erteń de jalǵasady.
