Sheteldikter Qazaqstanda 8 esirtki zerthanasyn iske qosýdy josparlaǵan

ASTANA. QazAqparat - ІІM Esirtki qylmysyna qarsy is-qımyl departamenti aýqymdy arnaıy operatsııa barysynda ınternet-resýrstardyń kómegimen sıntetıkalyq esirtkiler óndirisin jáne olardy Qazaqstan aýmaǵynda ótkizýdi uıymdastyrǵan transulttyq qylmystyq toptyń qyzmetin joıdy, – dep habarlaıdy Polisia.kz.

Ótken jyldyń sońynda Almaty oblysyndaǵy vedomstvonyń jedel qyzmetkerleri jedel sharalar júrgizdi. Shara barysynda óńir aýmaǵynda úsh jasyryn zerthanada sıntetıkalyq esirtki óndirisin uıymdastyrǵan segiz sheteldik anyqtalyp, ustaldy. Odan ári jedel-izdestirý is-sharalary barysynda polıtsııa qosymsha osy qylmystyq topty qarjylandyrýǵa, sondaı-aq prekýrsorlardy (esirtki óndirýge arnalǵan hımııalyq zattardy) jáne zerthanalyq jabdyqtardy shetelden Qazaqstanǵa jetkizýge jaýapty eki sheteldikti, ıaǵnı negizgi uıymdastyrýshylardy anyqtady.

Prekýrsorlardy jetkizýdi, saqtaýdy jáne ótkizýdi uıymdastyrǵan uıymdastyrýshylardyń biri Almaty qalasynda ustaldy.

Tintý barysynda ol jalǵa alǵan alty qoımadan esirtki óndirý tsıkline arnalǵan segiz birlik «reaktorlar» dep atalatyn arnaıy zerthanalyq jabdyq jáne 13 tonna prekýrsorlar tárkilendi.

Osylaısha, elimizde eki tonna sıntetıkalyq esirtki óndirýge (bul 4 mln bir rettik doza) jáne segiz iri esirtki zerthanasyn qurýǵa jol berilmedi.

Sondaı-aq sıntetıkalyq esirtki óndirýge arnalǵan 30 birlikten astam basqa jabdyq, onyń ishinde vakýýmdyq súzgiler, termoregýlıatorlar, sorǵylar tárkilendi. Úsh jeke úı men úsh avtokólikke tıym salyndy.

Tergeý jalǵasýda.