Sheteldikter qazaq balalaryn «smart» dep baǵalaıdy - matematık Serikbolsyn Dúısembaı
ASTANA. QazAqparat - Saýd Arabııasynda qazaq balalarynyń zerektigi men alǵyrlyǵyna tánti bolǵan sheteldikter bizdiń jastarǵa «smart» degen baǵa bergen.
Bul týraly sheteldegi ómirimen bólisken pavlodarlyq aıtysker aqyn, matematık, Serikbolsyn Dúısembaı agenttik tilshisine bergen suhbatynda málim etti dep habarlaıdy pavlodarnews.kz.
Búginde jas daryn Saýd Arabııasyndaǵy Korol Abdýlla atyndaǵy ǵylym jáne tehnologııa ýnıversıtetinde magıstratýra men doktorantýrada qoldanbaly matematıka jáne kompıýterlik ǵylymdar mamandyǵy boıynsha biliktilin jetildirýde.
«Bul bilim ordasynda alys-jaqyn elderden kelgen 1000-nan asa stýdent oqyp jatyr. Sonyń 20 shaqtysy - qazaqtar. Árıne, shetelde júrgendikten ári qanymyz bir qazaq bolǵandyqtan bir-birimizdi jaqyn tartyp, kómektesip turamyz. Sheteldikter qazaq balalaryn «smart», ıaǵnı aqyldy dep baǵalaıdy. Sebebi, ol jerge elimizdiń eń daryndy ári bilimdi stýdentteri jınalǵan. Mundaı deńgeıge jetýimizge Nazarbaev Ýnıversıtetinen alyp shyqqan bilimniń paıdasy tıgen bolar dep oılaımyn», - dedi Serikbolsyn Dúısembaı.
Ótken jyly pavlodarlyq aıtysker aqynnyń Nazarbaev zııatkerlik mektepteri men qazaq-túlik lıtseılerine túsýshilerge arnalǵan matematıka páninen oqýlyǵy jaryq kórgen bolatyn. Bıylǵy jyly ol ata-analar men oqýshylardyń ótinishi boıynsha qazaq tili men aǵylshyn tili pánderinen jeke jınaqtar shyǵaryp, matematıka oqýlyǵyn orys tiline aýdardy. Aldaǵy ýaqytta ol taǵy eki avtorlyq oqýlyǵyn jaryqqa shyǵarmaq. Bul jolǵy eńbegi oqýshylarǵa emes, JOO-nyń stýdentterine arnalady.
«Jalpy, elimizdiń JOO-da qazaq tilindegi sapaly matematıka kitabyn tabý qıyn ekeni jasyryn emes. Osy kemshiliktiń ornyn toltyrý maqsatynda joǵary oqý oryndaryna arnalǵan «Injenerlik matematıka» jáne «Syzyqtyq algebra» kitaptaryn jazýdy qolǵa ala bastadym. Osy oraıda sheteldik professorlarmen birge jumys istep jatyrmyn. Alaıda, bul jumys óte úlken qajyr-qaıratty, tabandylyqty qajet etedi», - dedi Serikbolsyn Dúısembaı.
