Sheteldikter asyrap alǵan qazaq balalarynyń taǵdyrynan syr shertetin biregeı telejoba jalǵasyn tapty (FOTO)
ASTANA. QazAqparat - Sońǵy 13 jylda 9 myńnan astam qazaq balasyn sheteldikter asyrap alǵan. Osynshama balanyń taǵdyry ne boldy? Ómiri, ata-anasy qandaı jáne kimder? Týǵan jeri, tegi, shyqqan ortasy qaısy? «Sheteldegi qazaq balalary» baǵdarlamasynyń avtory, júrgizýshisi ári prodıýseri Janar Baısemizova osy saýaldarǵa «Qazaqstan» telearnasynda bastalǵan jobanyń úshinshi maýsymynda jaýap izdeıdi.
«Qazaqstan» telearnasynyń tilshileri sheteldikter asyrap alǵan, jat jerde, ortada júrgen qazaqtyń ul-qyzdarynyń talaıly taǵdyryn kózimen kórip keldi.
Bul týraly ulttyq arnanyń baspasóz qyzmeti habarlady.
Baǵdarlamanyń maqsaty - jat jurtta tárbıelenip jatqan qazaqtyń bir bólshegin kórsetý arqyly olarǵa týǵan eli, ulty, tili, dini týraly aıtyp, sábı sanasyna sáýle túsirý. Habarda olardyń qazirgi ómir súrý ortasy, taǵdyrlary, turmys deńgeıi, bolmysy jan-jaqty baıandalady. Osy baǵdarlama arqyly syrtqa aǵylǵan qazaqstandyq jetim balalar men Qazaqstan arasynda baılanys ornatý, týǵan elden jyraq ketken balalarmen qarym-qatynasty úzbeý kózdelip otyr.
Baǵdarlama avtory Eýropada, AQSh pen Kanadada turyp jatqan 70-ke jýyq qazaq balasymen kezdesip qaıtty. Alysta júrgen jetimderimizdiń ómiri, arman-muraty, taǵdyr-talaıy júregi qazaq dep soqqan árbir azamatty alańdatpaı qoımaıdy. Ulttyq arnanyń atalǵan jobany birneshe jyl kóleminde júzege asyryp kelýiniń basty sebebi de osy.
Jesirin qańǵyrtpaǵan, jetimin jylatpaǵan el emespiz be?! Endeshe, bul jobaǵa beıjaı qaramaı, shetelderde qandas baýyrlarymyz ósip kele jatqanyn umytpaıyq!
Jiberip almańyzdar! 7 maýsym kúni saǵat 10.50-de «Qazaqstan» telearnasynyń efırinde «Sheteldegi qazaq balalary» jobasynyń ІІІ maýsymyn tamashalańyzdar.
