Sheteldik jýrnalıster Mańǵystaýdaǵy kıeli jerlerdi aralady
Memleket basshysy Nursultan Nazarbaev óz joldaýynda:
«Ulttyq mádenıetimizdiń ozyq úlgilerin iriktep alǵannan keıin shetelderde olardy tanystyrý rásimderin ótkizemiz» dep atap ótken bolatyn.
Ispanııa, Italııa, AQSh, Qytaı, Mysyr, Ulybrıtanııa, Frantsııadan kelgen 15 jýrnalıst sapardyń birinshi kúni Mańǵystaýdyń týrıstik jerleri - «Beket ata» jáne «Shopan ata» jerasty meshitterine bardy. Jýrnalıster sapar sońynda ózderiniń áserlerimen bólisti.
Mysaly, Ulybrıtanııalyq reporter Marıola Fedorchýktiń aıtýynsha, jergelikti halyqtyń adam jerleý saltynyń Qytaı jáne Japonııamen uqsastyǵy bar.
Sondaı-aq, Shopan Ata qorymynyń ertedegi jerleýin Slovenııamen salystyrdy. Qytaıdan kelgen jýrnalıst Chen Rýı Mańǵystaý jerinde qazaq halqynyń ózine tán baı mádenıeti men dástúri keńinen saqtalǵanyn atap ótti.
"Bul aımaq tarıhı oryndarǵa, ańyz-muralarǵa óte baı ekenin óz kózimizben kórip tańǵaldyq, osyndaı múmkindikke ıe bolǵanymyzǵa sizderge úlken rahmetimizdi aıtamyz. Jergilikti adamdardyń erekshe qonaqjaılylyǵyn atap ótkimiz keledi. Qazaqstandaǵydaı qonaqjaılylyqty eshqashan esh jerde kórmedik desek artyq ketpes. Sondaı-aq, bir aıta ketetinim, sheteldik týrısterdi, ásirese Eýropalyq týrıstredi eń aldymen eldiń ishki álemi, sonymen qatar erekshe mádenıeti, salt-dástúri men ádet-ǵuryptary qyzyqtyrady. Sol qyzyqtardyń barlyǵyn osy óńirden kóre aldyq deýge bolady. Erekshe ári baı tabıǵatyn, qyzyqty oryndary men tarıhyn saqtap qalǵan sizderge degen qyzyǵýshylyǵymyz zor», - dedi Frantsııalyq jýrnalıst Izabel Moran.
Mańǵystaý oblysynyń ákimi Eraly Toǵjanov sheteldik jýrnalısterdiń suraqtaryna jaýap berip, óńirdiń áleýmettik-ekonomıkalyq damýymen jetistikterin, shaǵyn jáne orta bıznestiń damýy týraly aıtty. Óńir basshysyna Qazaqstannyń jáne Mańǵystaýdyń biregeı mádenıetin saqtaý jáne týrıstik áleýetti damytý týraly suraq qoıyldy.
«Oblystaǵy týrızmdi damytý maqsatynda kafe men sanıtarlyq aımaqtary bar 10 vızıt ortalyqtaryn salýdy josparlap otyrmyz, onyń ishinde ekskýrsııalyq jáne kórme ortalyǵy, syılyq, ulttyq ónimder dúkenderi bolady. Ózbekstan shekarasyna deıin 85 shaqyrym jol qurylysy júrip jatyr. Joldyń uzaqtyǵy boıynsha týrısterge qajetti barlyq qolaıly jaǵdaıdy uıymdastyratyn ortalyqtar salynady. Keshe sizder Beket Ata men Shopan Ata qorymdaryn kórdińizder. Beket ata qorymy tek qana Mańǵystaýdyń ǵana emes, tutas Qazaqstannyń da sáýleti erekshe tarıhı jáne arhıtektýralyq eskertkishi. Qazaq halqy ádep-ǵuryptar men mádenıetin tarıhtaǵy eń qıyn kezeńde de saqtap qalǵan el. Bizdiń elimizde óziniń mádenıeti, dástúri men tilin saqtaǵan 130 ózge ult ókilderi turady. Barlyǵy birlik pen turaqtylyqtyń arqasynda tatý-tátti ǵumyr keshýde», - dedi Eraly Toǵjanov.
