Sheteldik jumys kúshiniń Qazaqstanda bolýyn retteıtin ýaqyt jetti - I. Adyrbekov
ASTANA. 28 maýsym. QazAqparat - Sheteldik jumys kúshiniń Qazaqstanda bolýyn retteı túsetin ýaqyt jetti. Búgin QR Parlamenti Senatynyń jalpy otyrysynda Halyqaralyq qatynastar, qorǵanys jáne qaýipsizdik komıtetiniń tóraǵasy Ikram Adyrbekov osylaı málim etti.
Senatordyń aıtýynsha, ótken jyly 94 myńǵa jýyq Qyrǵyz azamaty Qazaqstanǵa kelgen. Al Qazaqstannan Qyrǵyz eline barǵan azamattardyń sany 3 myńnyń aınalasynda ǵana.
«Qazaqstannyń demalys oryndarynda týrıst retinde júrgen qyrǵyz azamattary joq desek te bolady, olardyń barlyǵy derlik elimizge kelip, zańsyz bolsa da ártúrli salada jumys atqarmaq. Al endigi ýaqytta 90 kúnge ruqsat alǵan olarǵa jumys isteýge tolyq jaǵdaı jasap otyrmyz. Meniń oıymsha, buny retteıtin ýaqyt kelgen tárizdi. Máselen, Reseıdiń patenttik júıesi bar. Sony basshylyqqa alýymyz kerek. Sondyqtan da, qaı elden bolmasyn, Qazaqstanǵa kelgen azamattar bizdiń zańymyzdy buzbaıtyn bolýy, al jumys jasaıtyn bolsa bizdiń ekonomıkamyzǵa tıisti úles qosatyndaı bolýy shart», - dedi I. Adyrbekov.
Eske sala keteıik, búgin Senattyń jalpy otyrysynda «Qazaqstan Respýblıkasynyń Úkimeti men Qyrǵyz Respýblıkasy Úkimeti arasyndaǵy Qazaqstan Respýblıkasy azamattarynyń Qyrǵyz Respýblıkasy aýmaǵynda jáne Qyrǵyz Respýblıkasy azamattarynyń Qazaqstan Respýblıkasynyń aýmaǵynda bolý tártibi týraly» zańy qabyldandy. Atalǵan kelisimge sáıkes elimizdiń aýmaǵynda júrgen Qyrǵyz azamaty ýákiletti organdarǵa tirkelýge mindetti jáne kelgen azamat tirkeýden bastap 90 táýlikten aspaıtyn merzimde Qazaqstanda bola alady.
