Sheteldik jumys kúshin zańsyz paıdalanǵan 471 jumys berýshi jaýapqa tartyldy
QR ІІM sheteldikterdiń kóshi-qon zańnamasyn buzýshylyqtardy anyqtaýǵa baǵyttalǵan «Mıgrant» operatsııasyn qorytyndylady. Onda polıtsııa sheteldikter kóp turatyn jerlerdi, qurylys nysandaryn, bazarlardy, sheteldikterdiń jaldamaly eńbegin paıdalanatyn uıymdar men jumys berýshilerdi teksergen.
Іshki ister mınıstrliginiń ókili Shuǵyla Turlybektiń aıtýynsha, paıda tabý úshin jumys berýshiler arnaıy ruqsat qujattaryn almaı, sheteldikterdiń zańsyz eńbegin paıdalanady, osylaısha óz azamattarymyzdy eńbek etý múmkindiginen aıyrady.
«Elimizde sheteldikterdiń zańsyz eńbek etýine qatysty 2 741 fakti anyqtaldy, 471 jumys berýshi sheteldik jumys kúshin zańsyz paıdalanǵany úshin ákimshilik jaýapqa tartyldy. Mysaly, Almaty jáne Atyraý qalalarynyń qurylys nysandarynda zańsyz jumys istegen 145 sheteldik anyqtaldy. Osyǵan uqsas faktiler Astana, Shymkent, Túrkistan jáne Shyǵys Qazaqstan oblystarynda tirkeldi», - dedi Sh. Turlybek mınıstrliktiń onlaın brıfınginde.
Almaty men Shymkent, Atyraý jáne Pavlodar oblystarynda birneshe ret zańsyz sheteldik jumys kúshin tartqan jumys berýshiler anyqtaldy. Olarǵa qatysty sotqa deıingi tergeý bastaldy.
Sonymen qatar, operatsııa kezinde polıtsııa túrli sebeptermen jeke basyn kýálandyratyn qujat ala almaǵan azamattarǵa kómek kórsetti. Máselen, 1970 jyly týǵan, 53 jyl qujatsyz ómir súrgen Atyraý turǵynyna jeke kýálik alýǵa kómektesti. Dál osyndaı kómek Almatyda, Qyzylorda jáne Túrkistan oblystarynda kórsetilgen.
