Sheteldik týrısterdi salyqtan bosatatyn pılot jobasy 2024 jylǵa deıin uzardy
Memlekettik kirister komıteti týrızmdi damytý maqsatynda taýarlardy EAEO kedendik aýmaǵynan tysqary jerlerge áketý kezinde týrısterge (shetel azamattaryna) QQS somasyn óteýdi kózdeıtin «taks frı» pılot jobasyn iske asyryp jatyr.
Bul rette sheteldiktiń alyp bara jatqan taýarynyń satyp alý quny 20 aılyq eseptik kórsetkishten asýy kerek.
Qarjy mınıstriniń 27 maýsymdaǵy № 710 buıryǵymen pılottyq jobany iske asyrý merzimi 2023 jylǵy 30 maýsymnan 2024 jylǵy 31 jeltoqsanǵa deıin uzartyldy.
Endi pılottyq joba Shymkent qalasynda da júzege asady.
Ózgerister engizilgenge deıin pılottyq jobany iske asyrý merzimi aǵymdaǵy jyldyń 30 maýsymynda shektelgen jáne Astana, Almaty jáne Túrkistan qalalarynda ornalasqan saýda sýbektilerine qoldanyldy.
Buıryq Qazaqstan Respýblıkasynyń Ádilet mınıstrliginde 2023 jylǵy 29 maýsymda № 32935 bolyp tirkeldi jáne alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi.
