Sheteldik týrıster elimizdiń qaı óńirlerine kóp saıahattaıdy

ASTANA. QazAqparat – Qazaqstanǵa apta saıyn 11 myń sheteldik týrıst keledi. Ortalyq kommýnıkatsııalar qyzmetinde ótken brıfıngte Týrızm ındýstrııasy komıtetiniń tóraǵasy Dastan Ryspekov osylaı málim etti, dep habarlaıdy QazAqparat tilshisi.

«e-Qonaq» júıesiniń saraptamalyq derekterine nazar aýdarsaq, apta saıyn Qazaqstanǵa keminde 11 myń sheteldik týrıst keledi. Sheteldikter kóbine Almaty, Astana qalalary men Mańǵystaý oblysyna saıahattaıdy. Tek tamyz aıynyń ózinde e-Qonaq júıesi arqyly 52 myńnan astam sheteldik týrıst tirkeýden ótken», - dep atap ótti Dastan Ryspekov.

Onyń aıtýynsha, epıdemıologııalyq jaǵdaı, karantındik shekteýler men qańtar oqıǵasyna baılanysty otandyq týrızmniń kórsetkishteri pandemııaǵa deıingi deńgeıge jete almaı otyr. Komıtet tóraǵasy «UNWTO» boljamdaryn negize ala otyyra, halyqaralyq týrızm salasy 2024 jylǵa qaraı tolyq qalpyna keletinin atap ótti.

Sonymen qatar, Dastan Ryspekov brıfıng aıasynda otandyq týrızmde jyl sońyna qaraı kútiletin nátıjelerge toqtaldy. Málimdeýinshe, bıyl jyl sońyna deıin ishki týrısterdiń sany 8 mln adamǵa jetýi múmkin .