Sheteldik týrıst qyzdyń synynan keıin Asy ústirtinen 30 tonna qoqys shyǵaryldy

QONAEV. QazAqparat – Asy ústirti aýmaǵynda demalýshylardyń kóbi oryndaryn jınamaıdy. Kúl-qoqystaryn sol kúıi tastap ketedi, dep habarlaıdy QazAqparat tilshisi.

Áleýmettik jelide sheteldik týrıst tanymal Asy ústirtinde shashylyp jatqan qoqysty jarııalaǵan bolatyn.

«Asy ústirti – Sizderdiń elińizdiń injý-marjany, biraq bul jerlerdi shoshqa qora sııaqty ustasańdar, týrlaryńnan ne paıda? Jumys kúnderi tazalaýǵa baryp, birneshe dárethana ornatýǵa bolady ǵoı ? Sizder osy tabıǵat aıasyna kóp adam aparasyzdar, demalys kúnderi bul jerge 1000-1500 adam jınalady, shynymen de jınalyp, bul máselelerdi sheshý múmkin emes pe?», - dep surady sheteldik týrıst qyz.

Almaty oblysynyń ákimdigi Asy qyratynyń aýmaǵynda kempıngter ornatý boıynsha turaqty túrde is-sharalar júrgizilip jatqanyn habarlady.

«Demalys kúnderi 11-13 tamyz aralyǵynda aýqymdy týr uıymdastyryldy. Bul tabıǵattyń lastanýyna ákeldi. 15 tamyzda týrıster qaldyrǵan qoqystardy tazalaý maqsatynda Eńbekshiqazaq aýdanynyń ákimdigi «Іle Alataý» memlekettik ulttyq saıabaǵynyń ókilderimen birlesip senbilik ótkizdi. Atalǵan sharaǵa 43 myń adam tartyldy. Nátıjesinde 28 tonna qoqys shyǵarylyp, barlyq aýmaq tazartyldy», - dep túsindirdi oblys ákimdiginiń baspasóz qyzmeti.

Asy ústirti Kishi Túrgen ózeninen bastaý alyp, 60 shaqyrym jerge sozylyp jatyr. Ústirt 2800-3200 metr bıiktikte ornalasqan.