Sheteldik taýyq etinen salmonella men ishek taıaqshasy tabyldy - Bekshın

ASTANA. QazAqparat - Qoǵamdyq densaýlyqty saqtaý komıtetiniń tóraǵasy - Bas memlekettik sanıtarlyq dáriger Jandarbek Bekshın shetelden keletin taýyq etine jasalǵan saraptamanyń nátıjesin jarııalady, dep habarlaıdy QazAqparat tilshisi.

«Biz salmonella, lısterııa, ishek taıaqshasy sııaqty potogendi mıkroflorasy bar ónimderdi anyqtadyq. Sonyń ishinde «Brıanskıı broıler», «Chebarkýlskaıa ptıtsa», «Nagaıbaksk qus kesheni», «FınInvest», «Injevınsk qus fabrıkasy» jáne «Prıoskole» bar. Bunyń barlyǵy - Reseıdiń ónimderi. Budan bólek, AQSh-tyń eki kompanııasy, sondaı-aq, Belarýstyń «Kýrınoe tsarstvo Brıansk», «Smolevıcha Broıler», «Vıtebsk broıler fabrıkasy», «Drýjba qus fabrıkasy» men «Servolıýks Agro»-nyń ónimderinde qaýipti mıkroflora anyqtaldy», - dedi J.Bekshın Astanada ótken baspasóz máslıxatynda.

Atalǵan taýyq ónimderiniń patogendi mıkroflorasy 0,5-3,5 esege artyq bolyp shyqty.

Bas dárigerdiń aıtýynsha, sheteldik kompanııalar taýyq etiniń salmaǵyn arttyrý úshin fosfattardy paıdalanady. Eýrazııalyq ekonomıkalyq odaq pen Qazaqstan aımaǵynda fosfattar túrindegi qospalardy qoldanýǵa tyıym salynǵan. Alaıda óndirýshiler zańdy buzyp, fosfattardyń kómegimen ónimniń ylǵaldylyǵyn kóbeıtip otyrady.

«Máselen, eger jaı sýdy qossaq, onda ol muzǵa aınalyp, etti jyrtyp jiberedi. Al fosfattar etke sińip ketedi de, aǵyp ketpeıdi», - dep atap kórsetti J.Bekshın.

Foto: ria.ru