Sheteldik tasymaldaýshylarǵa ruqsat berý formasy ózgertildi
ASTANA. 29 qazan. QazAqparat - Aǵymdaǵy jylǵy 9 aıda júrip ótý ruqsatynyń bolmaýyna baılanysty 718 sheteldik avtokólik quraldary ustaldy. Bul ótken jylǵy osy kezeńmen salystyrǵanda 60 paıyzǵa artyq. Respýblıkada júrý erejelerin buzýmen kúresý maqsatynda sheteldik tasymaldaýshylar úshin ruqsat berýdiń jańa formasy shyǵaryldy.
Ruqsat berýdiń jańa formasy buǵan deıingi qoldanysta bar 2 qujatty, ıaǵnı sheteldik tasymaldaýshylardyń ekijaqty tasymalyn oryndaýǵa ruqsat berý men úshinshi elderge jáne odan júrip ótýge ruqsat berý qujattaryn biriktirdi.
Jańǵyrtylǵan ruqsat berý qorǵaýdyń birneshe deńgeıine ıe: sý ispetti belgiler, qorǵaý mıkrotalshyqtary, jeke shtrıh kodtary bar. Olar blankterdi burmalaýǵa jol bermeıdi. Mundaı faktiler buǵan deıin negizinen Reseı, Ýkraın jáne Túrkııanyń tasymaldaýshylary tarapynan kezdesip turatyn. Munymen qosa, blankterdiń jańa formalarynda jyrtylyp alynatyn bóliginiń bolýy olardy qaıtadan paıdalaný múmkindigin boldyrmaıdy.
Sheteldik tasymaldaýshylar tarapynan talap buzýshylyqtar sanyn azaıtý maqsatynda, sonymen birge otandyq tasymaldaýshylardyń halyqaralyq avtokólik qyzmet kórsetý rynogyndaǵy úlesin arttyrý maqsatynda sheteldik tasymaldaýshylar úshin ruqsat berý blankteriniń bolmaýyna baılanysty aıyppul ulǵaıtyldy. Aıtalyq, mundaı jaǵdaıda júrgizýshilerge aıyppul 25 AEK (43 275 teńge), al zańdy tulǵalarǵa 500 AEK (865 500 teńge) bolyp belgilendi. Bul týraly QR Kólik jáne kommýnıkatsııa mınıstrliginiń baspasóz qyzmetinen habarlady.
