Sheteldik tasymaldaýshylar kólik salasyndaǵy zańnamany jıi buzýda - Kólik mınıstrligi
ASTANA. 13 maýsym. QazAqparat - Qazaqstanda sheteldik ruqsat berý blankterin bir tasymaldaýshydan ekinshisine bergendigi úshin aıyppul sanktsııalary engizilýi yqtımal.
ıAǵnı, sheteldik ruqsatnamany basqa tasymaldaýshyǵa bergen otandyq júk tasymaldaýshy jazalanatyn bolady, ondaǵy aıyppul 20-45 aılyq eseptik kórsetkish shamasynda bolýy múmkin. Bul týraly búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.
Budan bólek, atalǵan zań jobasy boıynsha sheteldik halyqaralyq avtomobıl operatorlarynyń Qazaqstan aýmaǵyna ruqsat berilmegen kólikpen halyqaralyq tasymal jasaýyna aıyppul sanktsııalaryn ulǵaıtý da kózdeledi. Toqtala ketetin jaıt, aǵymdaǵy jyldyń bes aıynda sheteldik tasymaldaýshylardyń zań buzýshylyqtar sany eki esege artqan. Olardyń deni júk tasymaldaýǵa ruqsat beretin qujattardyń bolmaýy, belgilengen salmaq jáne gabarıttiń asyp ketýi, júrgizýshilerdiń eńbek jáne tynyǵý rejimin buzýy sekildi zań buzýshylyqtarǵa jatady.
