Sheteldik sarapshylar QSZI-diń aǵylshyn tilindegi jýrnalynyń avtory bolýda
ASTANA. QazAqparat - Sheteldik sarapshylar QR Prezıdenti janyndaǵy Qazaqstan strategııalyq zertteýler ıstıtýtynyń aǵylshyn tilinde jaryq kóretin «Central Asias Affairs» (Ortalyq Azııa saıasaty) jýrnalynyń avtory bolýǵa múmkindik aldy.
Bul týraly QazAqparat tilshisine jýrnaldyń jańa pishinin tanystyrý barysynda QSZI dırektorynyń orynbasary Botagóz Raqysheva málim etti.
«Osy jyldan bastap jýrnal halyqaralyq standartqa shamalas, ózgeshe pishinde shyǵarýda. Maqalanyń óziniń qurylymy ózgerip, avtorlarǵa arnalǵan nusqaýlyq ázirlendi. Onda maqala jazýdyń barlyq algorıtmi kórsetilgen. Biz redaktsııalyq keńestik quramyn da ózgertip, oǵan sheteldik sarapshylardy qostyq. Olar bizdiń avtorlarymyzǵa da aınaldy», - dedi ol.
Onyń sózine qaraǵanda, redaktsııalyq keńes quramyna Djordj Vashıngton ýnıversıteti halyqaralyq qatynastar mektebi Ortalyq Azııany zertteý baǵdarlamasynyń jetekshisi Marlen Larıýel, «Jamestown Foundations» (AQSh) sarapshysy Djeıkob Zenn, «Afghanistan Analysts Network» (Germanııa) dırektory Tomas Rýttıng, Qyrǵyzstannyń Ulttyq strategııalyq zertteýler ınstıtýtynyń burynǵy dırektory Talant Sultanov, Qytaı qazirgi zamanǵy qarym-qatynastar ınstıtýty Ortalyq Azııany zertteý bóliminiń dırektory Dın Sıaosın kirip otyr.
Aıta keterligi, Qazaqstan strategııalyq zertteýler ınstıtýty «Central Asias Affairs» jýrnalyn 2013 jyldan beri 3 aıda bir ret shyǵaryp keledi. Onda ǵalymdar men sarapshylar Ortalyq Azııamen baılanysty keń aýqymdaǵy materıaldaryn jarııalaıdy.
