Sheteldik sarapshylar Eýrazııanyń turaqty damýy týraly keńes berdi
«Báıterek» holdıngi uıymdastyrǵan sessııada «Eýrazııa turaqty damýda qaı baǵytta keledi?» suraǵy qoıyldy.
Gonkong ınvestıtsııalyq bankıng departamentiniń basshysy Barrı Chan Qytaıda turaqty damý máselesi qalaı qarastyrylatynyn aıtty.
«2013 jyly Tóraǵa Sı taza sý men jasyl taýlar tujyrymdamasyn jarııalady. Sonda QHR Tóraǵasy turaqtylyq – azamattardyń ál-aýqaty ekenin aıtty. Osylaı 2013 jyldan beri Qytaıda turaqtylyq týraly kóbirek bildik. Sı Tszınpın Nazarbaev Ýnıversıtetinde de Qytaı 2030 jylǵa qaraı kómirtegi shyǵaryndylaryn azaıtyp, 2060 jylǵa qaraı kómirtegi beıtaraptyǵyna jetetinimizdi aıtty. Bul bizdiń ulttyq maqsatymyz jáne azamattarymyz osy kózqarasqa jetý úshin jumys istep jatqanymyzdy biledi», - dedi B. Chan.
Al frantsııalyq MHB SAS ınvestıtsııalyq konsaltıngilik kompanııasynyń prezıdenti Marı Elen Berar Eýropada barlyq salada turaqty damý mindeti baryn aıtty. Biraq keıde turaqtylyq jańa jumys oryndary men tabys ákeletin jobalardy bastaýǵa múmkindik bermeıdi.
«Frantsýz Gııanasy aýmaǵy Amazonka ormandarymen qorshalǵan, altynǵa óte baı, biraq belsendi halyqtyń 30% jumyssyz otyr. Onda Brazılııa nemese Sýrınamnan kelgender altyndy zańsyz, tehnologııasy nashar, qaýipti túrde óndiredi. Keıbir iri kompanııalar frantsýz úkimetine altyn óndirýge jaýapty qaraıtyndaryn aıtty. Biraq elde qorshaǵan ortany qorǵaý ıdeıalarymen aınalysatyn agressıvti ÚEU ár gúl men ár kóbelekti qorǵap shyǵady. Men aıtqan Frantsııa mysaly Eýropanyń basqa elderine de qatysty. Germanııada qandaı da bir shahtany, taý qoınaýyn ashý múmkin emes. Batareıkalar men telefondar úshin bizge paıdaly qazbalar qajet. Bizde bul qazbalar bolsa da, shahtany asha almaımyz», - dedi ol.
«Báıterek» basshysy Qanat Sharlapaev turaqty damýǵa jetý men adamdardyń áleýmettik qajettilikteriniń balansy saqtalýy keregin aıtty.
«Eýropadaǵy energetıkalyq dısbalans pen ınflıatsııanyń ósýi jaǵdaıyn taldap, «jasylǵa» aýysý somasy jetkilikti baǵalanbady dep uıǵardyq. Biz óz áreketimizdiń saldaryn túsinýimiz kerek. Eger halyqtan góri qorshaǵan ortaǵa kóbirek kóńil bólseńiz, tabysqa jetý qıyn. Másele durys tepe-teńdik jolyn tabýda. Turaqty damý maqsattaryn qoldaý kerek, biraq Úkimettiń retteý sharalary ómir sapasynyń tómendetpeýin oılaǵan jón», - dedi ol.
