Sheteldik sarapshy Qazaqstannyń memqyzmetshilerine jumys tıimdiligin arttyrýǵa keńes berdi

Astanadaǵy Memlekettik qyzmet salasyndaǵy óńirlik habta bolǵan Azııalyq memlekettik basqarý salasydaǵy qaýymdastyqtyń prezıdenti, Ionseı ýnıversıtetiniń proıessory Pan Sýk Kım «QazAqparat» tilshisine bergen suhbatynda Qazaqstandaǵy memlekettik qyzmet júıesin odan ary jetildirýge qatysty óz oılarymen bólisti.

- Memlekettik qyzmet salasynda Astana óńirlik habynyń jumysyna qandaı baǵa beresiz? Hab jumysyn qaı baǵyttarda jetildirý qajet?

- Astanadaǵy Óńirlik habtyń negizgi mandaty - bul búkil álem boıynsha memlekettik qyzmet júıesindegi eń úzdik tájirıbeler týraly aqparattardy usyný, sonymen qatar Qazaqstandaǵy jáne óńirdiń basqa elderindegi memlekettik qyzmet salasynyń reformalaryn ilgeriletý. Sondyqtan, bul mandat óte mańyzdy, zor mánge ıe dep sanaımyn jáne Memlekettik qyzmet salasyndaǵy óńirlik hab qazirgi ýaqytta óte jaqsy jumys istep jatyr. Sonyń arqasynda memlekettik qyzmetshiler memlekettik basqarýdyń aldyńǵy qatarly tájirıbeleri jaıynda bilip, Qazaqstandaǵy memlekettik qyzmetti jetildirýde jańa kreatıvti ıdeıalar ázirleı alady.

 - Memlekettik qyzmet júıesi barynsha tıimdi bola túsýi úshin ne isteý qajet?

- Qazaqstannyń memlekettik qyzmet júıesi kásibı bolýy úshin qazaqstandyq memlekettik qyzmetshiler ózderiniń jumys tıimdiligin arttyrýlary qajettigin túsingeni jón. Qazir eseptilik konteksi ózgerýde. Al eseptilik memlekettik qyzmetshilerdiń qandaı da bir erejeler men normalardy saqtaýy tıis ekendigin bildiredi. Biraq, bul jetkiliksiz. Azamattardyń suranystary men boljaldaryna elgezektik tanytý qajet. Memlekettik qyzmetshi azamattardyń neni qalaıtyndyǵyn jáne memleket neni talap etetindigin oılaýy tıis. Sondyqtan da eń birinshi kezekte, memlekettik qyzmetshiniń jaýapkershiligi óz jumysynyń tıimdiligin arttyrýǵa negizdeledi. Bul úshin Úkimetke memlekettik qyzmetshilerdi attestattaý, olardyń jumystaryn baǵalaý júıesin ilgeriletýi kerek. Árbir basshy ózine baǵynyshty qyzmetkerdiń jumysyn baǵalaı  alýy, olardyń jumys kórsetkishterin bilýi tıis. Attestattaý júıesi aıqyn ındıkatorlar men standarttarǵa negizdelgen bolýy qajet. Sonda bul júıe ádil bolady. Memlekettik qyzmetshi jumysyn ádil baǵalaý óte mańyzdy. Óıtkeni, olaı bolmaǵan jaǵdaıda olar attestattaý júıesine senbeıdi.

- Qazaqstanǵa saparyńyzdyń qorytyndysyna qandaı baǵa berer edińiz?

- Habtyń basqarýshy komıtetiniń tóraǵasy Álıhan Baımenovpen kezdesý barysynda ekijaqty qarym-qatynasty odan ary damytý máseleleri men qaýymdastyǵymyzdyń Astanada ótetin jyl saıynǵy halyqaralyq konferentsııaǵa daıyndyq máselelerin jan-jaqty talqyladyq. Bul konferentsııa sáýir aıynyń 13-14 kúnderine josparlanyp otyr. Atalǵan halyqaralyq jıynda Azııa elderiniń jetekshi ǵalymdary sóz sóıleıtin bolady.

Sonymen qatar joǵary deńgeıdegi «Panazııalyq dıalog: Tıimdi basqarý jáne turaqty damý maqsattary» sessııasyn ótkizýdi josparlaýdamyz. Munan bólek, biz memlekettik basqarýdyń ózekti máseleleri boıynsha birlesken is-sharalar, zertteýler jáne ǵylymı jarııalanymdar shyǵarýdy qosa alǵanda memlekettik basqarý salasynda Hab pen Azııalyq uıym yntymaqtastyǵynyń negizgi baǵyttaryn talqyladyq.

- Suhbatyńyzǵa rahmet!