Sheteldik saparlarmen áýestenbeı, jattyǵýlardy elimizde tııanaqty ótkizý kerek - Týrızm jáne sport mınıstrligi
ASTANA. Tamyzdyń 14-i. QazAqparat /Rýslan Ǵabbasov/ - Sporttyq sheberlikti óz elimizde shyńdaý kerek. Bul týraly búgin Astanada Sport kúnimen quttyqtaýǵa arnalǵan jıynda QR Týrızm jáne sport mınıstri Temirhan Dosmuhambetov málim etti.
«Sońǵy kezde bizdiń jattyqtyrýshylardyń kóbi qarjy paıda bolǵannan keıin sheteldik saparlarmen áýestenip ketti. Endi bul saparlardy qysqartyp, barlyq daıyndyqty elimizde ótkizý qajet. Atap aıtqanda, bizge óte jaqsy sporttyq bazalar tapsyrylǵanyn eskere otyryp, sportshylar sporttyq sheberlikterin Qazaqstanda shyńdaýy tıis»,- dedi mınıstr.
«Biz bul saparlarmen budan ári de áýestene bersek, eshqandaı nátıjege qol jetkize almaımyz. Elimizdiń júldeger shtangısteri eshqaıda shyqpaı, barlyq daıyndyqtardy Tekelide ótkizdi. Endi aldaǵy ýaqytta Túrkııada álem chempıonaty bolady. Bul saıysqa da olar elimizde daıyndalyp jatyr. Bizdiń tanymal bylǵary qolǵap sheberleri, bıik nátıjege qol jetkizgen sportshylar sońǵy kezde eleýli qarjyǵa ıe boldy jáne jattyqtyrýshylar saparlarǵa qumartty»,- dedi T. Dosmuhambetov. Osy turǵyda mınıstr sport salasyndaǵy jetekshiler aldaǵy jumystardyń jospary men jattyǵýdyń úderisin durys qurýlary kerektigin tapsyrdy. «Qazirgi kezde komıtet ulttyq sport túrleri boıynsha jumystyń barsha josparyn qaıta qarastyryp jatyr. Jaqyn arada olar jańa baǵdarlamamen jáne jańa qurylymmen jumys isteıtin bolady»,-dedi vedomstvo basshysy.
