Sheteldik professor qazaqstandyq dárigerlerdiń suraǵyna jaýap berdi
ALMATY. QazAqparat - Sheteldik professorlar qazaqstandyq dárigerlermen koronavırýsty emdeý boıynsha tájirıbe bólisti, dep habarlaıdy QazAqparat tilshisi.
Zoom qosymshasy arqyly ótken onlaın konferentsııaǵa QR DSM ókilderi, aýrýhana basshylary, dárigerler qatysty. Bul dıalogty QR DSM Qoǵamdyq densaýlyqty saqtaý Ulttyq ortalyǵy uıymdastyrdy.
Onlaın alańda Petah-Tıkva aýrýhanasynyń anestezıologııa bóliminiń basshysy, Tel-Avıv ýnıversıteti medıtsına fakýltetiniń oqytýshysy, professor Leonıd Eıdelman jaýap berdi. Maman naýqastardy qandaı dári-dármekpen emdeý, qalaı kútý, qandaı jaǵdaılarda jasandy tynys alý apparatyna qosý kerektigi jaıly suraqtaryna jaýap berdi.
Olardyń aıtýynsha, qazir álem dárigerleriniń óz elinde túrli azdy-kópti tájirıbeleri qalyptasqan.
Biraq halyqaralyq DDU bekitken vırýsqa qarsy dáriler hattamasy óz tıimdiligin kórsetip otyr.
Sonymen qatar, koronavırýs balalar arasynda óte jeńil ótetini dáleldengen.
«Qazir bólimshelerde jatqan balalardyń eń basty problemasy - qalaı ýaqyt ótkizý. Óıtkeni kópshiliginiń ishteri pysyp jatyr. Sırek kedesetin jaıttar bar. Balalar qaıtys bolǵan, qatty aýyrǵan. Amerıkada jaqynda jańa týǵan bala shetinedi. Al kóbinese balalar arasynda bul vırýs sımptomy bilinbeı ótip jatyr. Biraq, joǵaryda aıtylǵan dárilerdi balalarǵa abaılap qoldaný kerek. Bul jaǵynan kóp tájirıbe joq», - dedi professor.
Dárigerlerdiń aıtýynsha, jınaqtalǵan málimetterge sáıkes, 0-10 jas aralyǵyndaǵy balalar arasynda koronavırýs óte sırek kezdesedi.
Sonymen qatar, professor basqa da sozylmaly aýrýlarmen aýyratyn naýqastar koronavırýs juqtyrǵan jaǵdaıda olarǵa ota jasaýǵa bolatynyn aıtty.
