Sheteldik nómirlerdi urlaǵan alaıaq kólik ıelerinen aqsha talap etip otyrǵan
TARAZ. QazAqparat – Tarazda alaıaq avtokólikterdiń nómirlerin urlap, keıinnen olardy qaıtarý úshin kólik ıelerinen aqsha talap etip, bopsalap otyrǵan, dep habarlaıdy QazAqparat.
Jedel-izdestirý is-sharasy barysynda Taraz qalasynyń 23 jasar turǵyny anyqtalǵan. Avtokólikterdiń memlekettik nómirlik belgilerin urlaýmen aınalysqan ol urlaǵan zattaryn «QIWI» ámııanyna 15-20 myń teńge kóleminde tólem túskennen keıin ǵana qaıtarýdy ádetke aınaldyrǵan. Bul týraly oblystyq polıtsııa departamentinen habarlady.
«Ol túnde tek sheteldik nómirlerdi, negizinen qyrǵyz jáne reseılik nómirlerdi túsirip, onymen qalaı baılanysýǵa bolatyndyǵy týraly aqparaty bar jazbany qaldyryp otyrǵan. Al ondaı jańa nómir alý úshin avtokólik ıelerine kórshi elge barýǵa týra keledi. Sondyqtan olarǵa alaıaqtyń talabymen kelisýge týra kelgen. Kólik ıeleri shart talaptaryn oryndaǵan, aqsha alǵannan keıin ury Whatsap messendjeri arqyly urlanǵan buıymdy jasyrǵan jerdiń koordınattaryn jiberedi. Іs júzinde alaıaq óz qurbandarymen baılanysqa shyqpaǵan, barlyq qarym-qatynas smartfon arqyly júzege asyrylǵan», -deıdi departamenttiń baspasóz qyzmetiniń jetekshisi Gúlsara Muhtarqulova.
Jedel-izdestirý is-sharalarynyń nátıjesinde Taraz qalasy ІІB-niń 1-polıtsııa basqarmasynyń krımınaldyq polıtsııa bóliminiń qyzmetkerleri uryny qolǵa túsirgen. Qazirgi ýaqytta kúdiktiniń qatysýymen bolǵan tórt urlyq dáleldengen. 23 jasar azamat óz kinásin tolyq moıyndady. QR QK-niń 187-baby 1-bóligi boıynsha sotqa deıingi tergeý amaldary júrgizilýde.
