Sheteldik munaı kompanııalaryn basqarýǵa qazaqstandyqtar kóptep tartylmaq
«Búginde elimizdegi sheteldik iri kompanııalardyń barlyǵynda departament basshylary shetel azamattary. Kóptegen kompanııalardyń Qazaqstanda jumys istep jatqanyna 20 jyldan asty, degenmen kompanııa basshylarynyń ishinde otandyq mamandar joq. Sondyqtan bizdiń odaq QR Energetıka mınıstrligimen birigip sheteldik munaı óndirý kompanııalaryndaǵy basshylyq qyzmetke, naqty aıtqanda departament basshylyǵyn otandyq mamandarmen qamtý jobasyn qolǵa aldyq», - dedi Qazaqstan munaı servıs kompanııalar odaǵynyń jobalaryn basqarýshy Nııaz Jumat OKQ-de ótken baspasóz máslıhatynda.
Onyń aıtýynsha, iri kompanııalardy qazaqstandyqtardyń basqarýynyń artyqshylyǵy otandyq munaı óndirý kompanııalarynyń jumysynyń alǵa basýyna septigin tıgizedi eken.
Sonymen qatar munaı servıs odaǵynyń ókili qazirde Teńiz Shevroıl, Qarashyǵanaq taǵy basqa iri munaı óndirý kompanııalary basshylyǵynda birde-bir Qazaqstan azamatynyń joqtyǵynda tilge tıek etti.
«Sheteldik mamandar bizge 3-4 jylǵa kelisimshartpen keledi, olar Qazaqstannyń ishki naryǵyn tolyq bilmeıdi, osy turǵyda óz azamattarymyzdyń pozıtsııasyn usynyp, qoldaýymyz kerek. Osy maqsatta 2025 jylǵa deıin barlyq iri munaı kompanııalary basshylyq qyzmetterinde Qazaqstan azamatynyń bolýyn qamtamasyz etý, basqasha aıtqanda talap etýdi qolǵa alýdamyz», - dedi ol.
Buǵan deıin habarlaǵanymyzdaı, elimizde aldaǵy jyldan bastap Kaspıı teńizinde Hazar jáne Qalamqas munaı óńdeý jobalary sol sııaqty Teńiz ken qoınaýynda bıýdjeti 5 mlrd AQSh dollaryn quraıtyn taǵy bir munaı óndirý jobasy iske qosylady.
