Sheteldik marketpleıster Qazaqstan bıýdjetine 6,1 mlrd teńge tóledi

NUR-SULTAN. QazAqparat - Jyl basynan beri ınternette qyzmet kórsetetin sheteldik kompanııalar, sondaı-aq ınternet arqyly jeke tulǵalarǵa taýarlardy satatyn sheteldik saýda alańdary (marketpleıster) qosylǵan qun salyǵy nemese GOOGLE salyǵyn tóleýi kerek.

Bul týraly QR Qarjy mınıstrligi Memlekettik kirister komıtetinen habarlady.

GOOGLE salyǵyn tóleıtin sheteldik kompanııa úshin tirkeý talaptary jeńildetilgen. Máselen, tirkeý esebine turý úshin sheteldik kompanııa QR QM Memlekettik kirister komıtetine hat jiberse jetkilikti. Osy arqyly olar shartty tirkeýden ótedi.

Jyl basynan beri 37 sheteldik kompanııa, sonyń ishinde Apple, Meta, Google, Ebay, Amazon jáne basqa da kóptegen álemdik kompanııalar shartty tirkeýden ótti. 2022 jyldyń basynan bastap atalǵan kompanııalar 6,1 mlrd. teńge somasyna salyq tóledi.

Eń iri salyq somalaryn Irlandııanyń rezıdentteri bolyp tabylatyn «Meta Platforms Ireland Limited» (1,6 mlrd. teńge) jáne «Apple Distribution International Limited « (1,1 mlrd. teńge), sondaı-aq AQSh rezıdenti «OOO iHerb» (1,4 mlrd. teńge) tólegen.

Qandaı kompanııalar qansha salyq tólegeni týraly aqparatty Memlekettik kirister komıtetiniń saıtynan kórýge bolady.

«Salyq deklaratsııasyn tapsyrýdyń qajeti joq, aıyppuldar men salyqtyq ákimshilendirýdiń basqa da kúrdeli tetikteri joq ekenin atap ótken jón. Munyń bári taýarlarmen elektrondy saýdany júzege asyratyn nemese qazaqstandyq satyp alýshynyń atyna elektrondyq qyzmetter kórsetetin sheteldik kompanııa úshin Qazaqstan Respýblıkasyndaǵy salyq mindettemeleriniń oryndalýyn ońaılatý maqsatynda jasaldy», - dep atap ótti MKK-den.