Sheteldik mamandarǵa jalaqynyń basym bóligi olardyń tabys ákelýine baılanysty tólenedi - Ó. Shókeev

ASTANA. QazAqparat - Sheteldik mamandar jalaqysynyń basym bóligi olardyń tabys ákelýine baılanysty tólenedi. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Samuryq-Qazyna» Ulttyq ál-aýqat qory» AQ basqarma tóraǵasy Ómirzaq Shókeev osylaı málim etti.

Qor basshysynyń aıtýynsha, 2012 jyldan beri «Samuryq-Qazyna» kompanııalary aıasynda personaldarǵa qaralatyn shyǵyndar qysqartylyp keledi.

«Máselen, ákimshilik-basqarý personaly boıynsha eki myńǵa tarta jumys orny qysqardy. Sonymen qatar, eger biz transformatsııalaýdy júzege asyrǵymyz kelse, ózimizde halyqaralyq standarttar engizsek, onda bizge halyqarlyq tájirıbe men bilimge ıe mamandar kerek. Sondyqtan da, biz rekrýtıngtik kompanııalar arqyly álemdik deńgeıli sheteldik mamandardyń birnesheýin taýyp, jaldadyq. Olardyń biri «IBM», «GE-Fılıp Morrıs» kompanııalarynda istegen», - dedi Ó. Shókeev.

Onyń aıtýyna qaraǵanda, halyqaralyq rekrýtıngtik kompanııalardyń usynysy boıynsha sheteldik mamandardyń jalaqysy eki bólikten turady, onyń birinshisi turaqty, ekinshisi aýyspaly bólikten. Al mundaǵy turaqty bólik 20, aýyspaly bólik 80 paıyzdy quraıdy.

«Olardyń jalaqysy básekege qabiletti bolýy shart. Óıtkeni, bizdegi jalaqy basqa elderge, tipti Reseıge qaraǵanda birshama tómen. Sondyqtan da ondaı mamandarǵa jalaqy tóleýdiń eki bóligi qarastyrylǵan. Mundaǵy aýyspaly bólik kompanııaǵa tabys ákelýine baılanysty tólenedi», - dedi Ó. Shókeev.