Sheteldik kompanııalardyń Qazaqstannyń saqtandyrý naryǵyna enýge asa qulshynysy joq - Borıs Ýmanov
ALMATY. 8 mamyr. QazAqparat - Qazir sheteldik kompanııalar Qazaqstannyń saqtandyrý naryǵyna enýge asa qulshynys tanytyp otyrǵan joq.
«Eýrazııa» saqtandyrý kompanııasy» AQ-nyń basqarma tóraǵasy Borıs Ýmanov búgin Almatyda ótken baspasóz máslıhatynda osylaı aıtty.
«Qazaqstannyń saqtandyrý naryǵynda búgingi tańda 5-10 táýir kompanııa bar. Sheteldik kompanııalar olarmen básekelesýge asa yqylasty emes. Batys kompanııalary qazir Reseıde barynsha belsendi jumys jasaýda. Óıtkeni onda saqtandyrý kompanııalaryna qoıatyn talaptary Qazaqstanǵa qaraǵanda asa qatal emes», - deıdi B. Ýmanov. Onyń aıtýynsha, Qazaqstanda qazir saqtandyrý kompanııalarynyń jaqsy irgetasy qalandy. Naryqta damý úderisi júrip jatyr. Búgingi tańda qazaqstandyq kompanııalar saqtandyrý qyzmetin eksportqa shyǵaryp, syrttan valıýta ákele bastady.
