Sheteldik kompanııalardyń basqa jerge kóshýine qolaıly jaǵdaı jasaýǵa aıryqsha nazar aýdarýdy usynamyn - Toqaev

NUR-SULTAN. QazAqparat – Qazaqstan Prezıdenti Qasym-Jomart Toqaev EAEO-ǵa múshe elderdiń jańa ınvestıtsııalyq jobalaryn ashýdy usyndy, dep habarlaıdy QazAqparat tilshisi.

Prezıdent qazirgi geosaıası jaǵdaıdyń uzaqqa sozylatynyn jáne buǵan daıyn bolý kerektigin atap ótti.

«Osyǵan baılanysty, bizdiń oıymyzsha, ıntegratsııalyq birlestiktiń qazirgi jaı-kúıi men qajettilikterine jaýap beretin Qazaqstannyń eki bastamasyn qarastyrýdy usynamyn. Birinshi bastama – 2020 jylǵy jeltoqsanda biz Odaqtyń negizgi qujaty – EAEO damý strategııasyn qabyldadyq. Ony iske asyrý úshin basym salalarda tıimdi kooperatsııa men saýda-ekonomıkalyq baılanystardy qurý jumystary bastaldy. Endi naqty jobalar men naqty nátıjeler qajet», - dedi Memleket basshysy Joǵarǵy Eýrazııalyq ekonomıkalyq keńestiń otyrysynda.

Ol úshin Prezıdent EAEO-ǵa múshe elderdiń birlesken jobalaryn aıaqtaýdy jedeldetý men jańa ınvestıtsııalyq jobalarǵa bastamashylyq jasaý keregin aıtty.

Qasym-Jomart Toqaev keńes qatysýshylaryna qazirgi jaǵdaılar men ıntegratsııalyq birigý úderisine saı keletin Qazaqstannyń eki mańyzdy bastamasyn qarastyrýdy usyndy.

«Mańyzdy jobalar men naqty nátıjeler kerek. Bul úshin Eýrazııalyq ekonomıkalyq odaqqa múshe memleketterdiń birlesken jobalaryn tezirek aıaqtaý qajet, sondaı-aq jańa ınvestıtsııalyq jobalar usyný kerek. Aımaqtyq jáne jahandyq básekege qabilettilikti qamtamasyz ete otyryp, bıznes salasyndaǵy yqpaldastyqty kúsheıtý, transqurlyqtyq dálizderimizdiń jyldamdyǵyn jetildirý qajet. Sanktsııalardy eskere otyryp, sheteldik kompanııalardyń basqa jerge kóshýi úshin qolaıly jaǵdaı jasaý máselesine aıryqsha nazar aýdarýdy usynamyn. Álemdik alpaýyt elder de Eýrazııalyq ekonomıkalyq odaqqa múshe memleketterdiń geoekonomıkalyq ornalasý jaǵynan basymdyqqa ıe ekenin jaqsy biledi. Sondyqtan 180 mıllıon tutynýshysy bar naryǵymyzdyń áleýetin elemeý múmkin emes. Atalǵan sharalardy 12 aıdyń ishinde júzege asyrýdy usynamyn», – dedi Qazaqstan Prezıdenti.

Buǵan deıin Prezıdent EAEO qyzmet etken jyldary Qazaqstannyń ózara saýdasy 33 paıyzǵa, eksporty 55 paıyzǵa artqanyn málimdegen edi.

Sonymen birge, Q. Toqaev osynaý kúrdeli ýaqytta «úshinshi» eldermen jáne ıntegratsııalyq birlestiktermen seriktestikti keńeıtý men tereńdetýdiń mańyzy artqanyn aıtty.