Sheteldik kompanııalar Túrkistan oblysyna ınvestıtsııa salady
Halyqaralyq ınvestıtsııalyq jəne týrıstik forým aıasynda Malaızııadan kelgen «Nagasteel Equipment Sdn. Bhd.» kompanııasymen 100 mln AQSh dollaryna óńirde ınfraqurylymdy jáne ónerkásip salasynda iri jobalardy júzege asyrý boıynsha memorandýmǵa qol qoıyldy. Alqaly jıynǵa kelgen túrkııalyq «Sallyr Bey Group» korporatsııasy jalpy quny 15 mln AQSh dollaryna qoı sharýashylyǵyn órkendetýge baǵyttalǵan fermanyń qurylysyn júrgizbek.
Túrkistan oblysyna ınvestıtsııa tartyp, týrızm salasyn túletýge baǵyttalǵan halyqaralyq jıynda qytaılyq «Jiangsu Huale Electric Co., ltd» kompanııasy qýattylyǵy 50 mVt-tyq Kún elektr stansasynyń qurylysyna 50 mln AQSh dollaryn baǵyttaıtyn boldy. Al Chehııadan kelgen «AGRAS zelatovice a.s.» uıymy 20 mln AQSh dollaryna aq júgerini qaıta óńdeıtin zaýyt salady.
Sondaı-aq, Qazaqstan jáne ıtalııalyq «Kazakhstan Project Preparation fund» birikken kásiporny sapaly keramzıt óndiretin zaýyt qurylysyna 17 mln AQSh dollaryn bóledi. Otandyq «VMS» JShS Túrkistan oblysynda týrızm salasynda ınvestıtsııalyq jobalarmen áriptestik tanytý maqsatynda 1,5 mln AQSh dollaryn baǵyttamaq.
Forým nátıjesinde Qytaı elinen kelgen «Chery Commercial Vehicle.,LTD» kontserni jalpy quny 20 mln AQSh dollaryna avtokólik shyǵaratyn zaýyt qurylysyn júrgizse, qytaılyq «Hýaveı Tehnolodjız Kazahstan» kompanııasy Túrkistanda «Aqyldy qala» jobasy boıynsha yntymaqtastyq tanytýda 10 mln AQSh dollar kóleminde ınvestıtsııa salatyn boldy. Al polshalyq «FCA» uıymy 1 mln AQSh dollaryna talshyqty-optıkalyq symdar jáne jelilik qurylǵylar óndiretin zaýyt qurylysyn júrgizbek. Sonymen birge, reseılik Eýrazııalyq bank Túrkistan oblysynda ınvestıtsııalyq jobalarǵa yntymaqtastyq tanytatyn bolsa, Birikken Arab Ámirliginen kelgen «Al-Masood» kompanııasy óńirde týrızm salasyn damytýda áriptestik jasamaq.
Atalǵan ınvestorlar aldaǵy ýaqytta Túrkistan qalasy men oblys aýmaǵynda óz jumystaryn bastaıdy. Nátıjesinde aımaqta aýyl sharýashylyǵy, ınfraqurylym, týrızm men jeńil ónerkásip órkendep, óńirde jańa óndiris oryndary ashylmaq.
