Sheteldik kompanııalar kenishtegi gazdy erikkennen jaǵyp otyrǵan joq - zańger
ASTANA. QazAqparat - Qazaqstandaǵy sottarda ınvestıtsııalyq daýlardy qaraý tájirıbesine arnalǵan búgingi jıynda munaı-gaz salasyndaǵy qazaqstandyq zańgerler qaýymdastyǵynyń prezıdenti Jumageldi Elibaev sýdıalardan ınvestorlardyń keıbir áreketterine túsinistikpen qaraýdy surady. Sonyń ishinde kópten beri talqylanyp jatqa kenishtegi gazdy jaǵý problemasy da bar, dep xabarlaıdy QazAqparat tilshisi.
«Zańnyń basqa da salalarynda «májbúrli shara» degen túsinik bar. Ony bárimiz jaqsy bilemiz. Ekologııalyq zańnamada da ondaı quqyqtyq ınstıtýt bar. Máselen, jer qoınaýyn paıdalanýshy sheteldik kompanııa fakelder arqyly gazdy jaǵyp otyrady. Ony ne úshin isteıdi? Sebebi gazdy jaqpasa, óndiristik nysandarda apat bolady. Al onyń arty texnıkalyq qıyndyqtarǵa, tipti adam shyǵynyna ákelip soqtyrýy ábden múmkin. Demek, bul - «májbúrli shara». Qarashyǵanaqty nemese Teńizshevroıldy alaıyqshy, atalǵan kompanııalarǵa qarasty zaýyttardyń ushy-qıyry kórinbeıdi. Óndiristik qurylǵylardyń qysymy da, temperatýrasy da joǵary. Myńdaǵan jumysshy júredi. Osyndaıda qandaı da bir aqaýlyq bolsa, texnıkanyń ózi avtomatty túrde gazdy fakel arqyly jaǵyp jiberedi. Olaı istemese, adam shyǵyny da, qarjylaı shyǵynnyń da kóp bolatyny belgili. Búginde onyń bárin tekserip alýǵa múmkindik bar. Sondyqtan sýdıalarda osyndaı máselelerge túsinistikpen qaraýdy suraımyn», - deıdi Elibaev.
Onyń aıtýynsha, búginde ınvestıtsııalyq daýlar kezinde shaǵyp túsirgen memlekettik organnyń ózi sheteldik kompanııanyń fakel arqyly gazdy jaǵý áreketin «májbúrli shara» dep kórsetse de, sýdıalar oǵan qaramaı, mıllıondaǵan aıyppuldy óndirip alý týraly sheshim shyǵaryp otyrady.
Aıta keteıik, ótken jyly Joǵarǵy Sottyń qaraýyna ınvestıtsııalyq daýlarǵa qatysty 22 aryz túsken bolatyn. Sonyń basym bóligi - munaı-gaz salasyndaǵy jumys isteıtin iri ınvestorlar. Olar kóp jaǵdaıda memlekettik organdardyń tarapynan jiberilgen salyq máselelerin daýlaıdy .
QR Joǵarǵy Sotynyń mamandyrylǵan sot alqasynyń tóraıymy Aıgúl Qydyrbaevanyń aıtýynsha, búgingi zańnamada ınvestıtsııalyq daýlardy qysqa ýaqyttyń ishinde qaraý mindeti qoıylsa da, ınvestorlardyń ózderi ondaı isterdiń merzimin uzartýdy surap otyr.
