Sheteldik kompanııalar eshqashan bizge kómek bereıik dep kelmeıdi - QR Ulttyq ınjenerlik akademııasynyń vıtse-prezıdenti
ALMATY. Qyrkúıektiń 28-i. QazAqparat /Erlik Erjanuly/ - Qazaqstanda áli kúnge deıin óndiris oryndarynda qoldanylyp jatqan sheteldik tehnologııalardyń sapasyna ǵylymı saraptamalar jasalmaı otyr. Bul búgin Almatyda "Munaıgaz óndirisiniń ǵylymı-tehnologııalyq jáne ekologııalyq máselelerin matematıkalyq modeldeý" degen taqyryppen ótip jatqan VII Halyqaralyq qazaqstandyq-reseılik ǵylymı-tájirıbelik konferentsııasynda aıtyldy, dep habarlaıdy QazAqparat.
"Sheteldik kompanııalar eshqashan bizge kómek bereıik dep kelmeıdi. Báriniń de kókeıin tesken nárse qandaı jolmen bolsa da kóbirek paıda tabý. Ókinishke oraı biz kúni búginge deıin olardyń óndiriste qoldanyp otyrǵan tehnologııalarynyń sapasyn bilmeımiz. Oǵan eshqandaı da ǵylymı saraptamalar jasalmaı otyr", deıdi QR Ulttyq ınjenerlik akademııasynyń vıtse-prezıdenti Nádir Nádirov. Akademıktiń aıtýynsha, eger otandyq ǵalymdardyń ashqan jańalyqtary, jasaǵan tehnologııalary óndiriske enbeıtin bolsa Ǵylym akademııasy men ǵylymı-zertteý ınstıtýttaryn ustap turýdyń qandaı qajettilikteri bar. Eger óndiris oryndarynyń syrttan alyp kelip jatqan tehnologııalary men qural-jabdyqtary qazaqstandyqtardyń jasaǵandarynan shynynda da ozyq bolatyn bolsa ony jan-jaqty talqylap ǵalymdardyń kelisimin alýǵa múmkindik jasasyn. Sondyqtan da qazir ǵalymdar osy ózekti máseleni kóterip, kún tártibine shyǵarýda. Ol aldaǵy ýaqytta óz jemisin berýi múmkin.
