Sheteldik kompanııada jumys isteıtin qazaqstandyq jáne sheteldik mamannyń jalaqy aıyrmashylyǵy 10 esege jýyq
ASTANA. 18 sáýir. QazAqparat - Qyzylorda oblysynda sheteldik kompanııada jumys isteıtin qazaqstandyq jáne sheteldik mamannyń jalaqy aıyrmashylyǵy 10 eseni qurap otyr.
Bul týraly búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Murat Baqtııaruly osylaı málim etti.
Senatordyń aıtýynsha, aımaq turǵyndarymen, sheteldik kompanııadaǵy jumys jasap jatqan jumysshylarmen jáne aımaq basshysymen kezdesý barysynda Qyzylorda oblysyndaǵy sheteldik jumys kúshin tartatyn kompanııalardyń shetel jáne qazaqstandyq mamandarǵa jalaqy tóleý máselesine baılanysty úlken sáıkessizdik (dısproportsııa) bar ekeni kóterilgen.
Memleket basshysynyń tapsyrmasyna sáıkes oblystaǵy shetel jumys kúshin tartatyn kompanııalarda júrgizilgen tekserý jumystarynyń nátıjesinde 9 kompanııada laýazymdary men atqaratyn fýnktsıonaldyq mindetteri birdeı qazaqstandyq jáne sheteldik qyzmetkerlerdiń jalaqysynda sáıkessizdik (dısproportsııa) faktisi anyqtalǵan. Shetel qyzmetkerlerine laýazymdyq eńbekaqy men sheteldegi jumysy úshin aýmaqtyq ústemaqysynan basqa, zańmen kózdelmegen ústemaqy túrleri jáne syıaqy men ózge de tólemder eseptelinip tólenetindigi, keıbireýindegi jalaqy aıyrmashylyǵy 10 esege deıin jetetindigi belgili boldy. Mysaly, «PetroQazaqstan Qumkól Resorsız» kompanııasynda jumys jasap jatqan qazaqstandyq ýchaske sheberiniń ortasha jalaqysy 315 myń teńge bolsa, sheteldik dál osy laýazymdaǵy mamannyń jalaqysy 3 mıllıonnan astam teńgeni quraıdy. Mundaı mysaldar óte kóp», - deıdi Murat Baqtııaruly.
Onyń sózine qaraǵanda, Qazaqstan Respýblıkasynyń qoldanystaǵy eńbek jáne jumyspen qamtý zańnamalarynda sáıkessizdik faktisi oryn alǵan jumys berýshilerge qatysty áser etý tetikteri qarastyrylmaǵan.
«Osyǵan oraı, áleýmettik shıelenisterdi boldyrmaý maqsatynda qazaqstandyq jáne sheteldik qyzmetkerlerge eńbek aqy tóleýde úlken sáıkessizdik jáne jumysshylardyń 3 aıdan astam jalaqyǵa qaryzy bar faktiler anyqtalǵan jaǵdaıda, Qazaqstan Respýblıkasyna sheteldik jumys kúshin tartýǵa arnalǵan kvotany belgileý qaǵıdalaryna jáne sheteldik qyzmetkerlerge jumysqa ornalasýǵa jáne jumys berýshilerge sheteldik jumys kúshin tartýǵa ruqsat berýden bas tartý sharttaryn engizýdi usynamyz», - deıdi M. Baqtııaruly.
