Sheteldik kólikti zańdastyrý nelikten aýdan ortalyqtarynda júrgizilmeıdi
Shetelde satyp alynǵan, biraq tirkeýden shyǵarylmaǵan kólikterge qazaqstandyq qujat alý úshin mindetti túrde oblys ortalyǵy – Petropavl qalasyna barý qajet.
«Azamattarǵa arnalǵan úkimet» Memlekettik korporatsııasy» kommertsııalyq emes AQ SQO fılıalynyń málimetinshe, aýdan turǵyndary eGov.kz arqyly avtomobılge qatysty málimetterdi tekserýge ótinish qaldyra alady. Ol úshin oblys ortalyǵyna kelýdiń qajeti joq. Oń jaýap alǵannan keıin ǵana mamandandyrylǵan Halyqqa qyzmet kórsetý ortalyǵyna aldyn ala jazylý arqyly, zańdastyrý rásiminen ótý úshin keledi. Tek osydan keıin HQKO-da tehpasportpen agregattar tekserilip, kólik zańdastyrýdan ótedi», - deıdi «Azamattarǵa arnalǵan úkimet» SQO fılıalynyń baspasóz hatshysy Anar Qusanova.
SQO Polıtsııa departamentiniń baspasóz qyzmeti de osy máselege qatysty túsinik berdi.
«Mamandandyrylǵan Halyqqa qyzmet kórsetý ortalyǵynyń arnaıy angary bar. Ol jerge beınekameralar qoıylǵan, ıaǵnı avtokólikti tekserý protsesi bastan-aıaq jazylady. Jazba saqtalady. Sondaı-aq kólikti ruqsat qujaty bar arnaıy mamandar ǵana teksere alady. Al aýdandarda ondaı múmkindik joq. Sondyqtan oblys ortalyǵyna kelip qana kólikti tolyq zańdastyrý rásiminen ótkizýge bolady», - deıdi tártip saqshylary.
Shetelde tirkelgen kólikterdi Qazaqstanda zańdastyrýdyń birrettik aktsııasy bastalǵaly SQO-da 809 adam ótinish bergen. Sonyń 291-i qazaqstandyq nómir aldy.
Qazirgi ýaqytta Petropavldaǵy mamandandyrylǵan Halyqqa qyzmet kórsetý ortalyǵynda jumys qalypty jaǵdaıda júrgizilip jatyr.
Buǵan deıin SQO-da, polıtseılerdiń esebi boıynsha, 7 myńnan astam kóliktiń zańdastyrý rásiminen ótýi tıis ekenin aıtqan edik.
