Sheteldik kásipkerlerdi Qazaqstanda qandaı máseleler mazalaıdy
ASTANA. QazAqparat - QR Ulttyq ekonomıka mınıstrligi barlyq dıplomattardy jınap, Qazaqstannyń ekonomıkasyn damytý salasyndaǵy josparlardy tanystyrdy. Osy oraıda elshiler kókeıde júrgen suraqtaryn qoıdy, dep xabarlaıdy QazAqparat tilshisi.
Nıderlandy elshisi Dırk ıAn Koptyń aıtýynsha, taza ekonomıkalyq kórsetkishtermen bıznes ortany jaqsartý múmkin emes. Zań ústemdigi bolmasa, ınvestorlar kelýge asyqpaıdy. "Biz Qazaqstannyń iri ınvestory ári áriptesi retinde osy eldiń damýyna múddelimiz. Ekonomıkalyq yntymaqtastyq jáne damý uıymyna múshe bolýǵa degen qulshynysyńyz da qýantady. Sebebi oǵan damyǵan 30 memleket kiredi. Biraq atalǵan uıymnyń reıtınginde ekonomıkalyq ındıkatorlar men zań ústemdigi arasynda tyǵyz baılanys bar. Onyń ishinde sybaılas jemqorlyqpen kúres, adam quqyqtary jáne taǵy basqa máseleler eskeriledi. Sondyqtan taza ekonomıkalyq ındekske basymdyq bermeı, basqa da kórsetkishterdi jetildirý kerek. Sonda ǵana bıznes klımat jaqsarady", - dedi D.ıAn Kop.
QR Ulttyq ekonomıka vıtse-mınıstri Mádına Júnisbekovanyń aıtýynsha, búginde el Úkimet azamattardyń quqyqtaryn qorǵaý, jalpy zań ústemdigi máselesine basa nazar aýdaryp keledi. "Árıne, taza ekonomıkalyq kórsetkishtermen kete berýge bolmaıdy. Biz ony jaqsy túsinemiz. Máselen, siz sybaılas jemqorlyq týraly aıttyńyz. Qazaqstan sybaılas jemqorlyqpen kúres boıynsha Stambýl josparyna qosylǵan bolatyn. Osy salada nátıjeli jumys atqarylyp keledi. Adam quqyqtaryn qorǵaý sharalary da qolǵa alyndy. Prezıdenttiń bes ınstıtýtsıonaldy reformasy bar. Atalǵan maqsattar zań ústemidigin kúsheıtýdi kózdeıdi", - dep atap kórsetti M.Júnisbekova.
Al Lıvan elshisi Vazken Kavlakıan ınflıatsııanyń deńgeıin tómendetýge qatysty suraq qoıdy. "Ótken jyly ekonomıkalyq ósim 4 protsentti qurady dedińiz. Olaı bolsa, nege ınflıatsııanyń deńgeıi 7,1 protsent boldy? Ony tómendetý úshin ne istep jatyrsyzdar?", - dep surady V.Kavlakıan.
Vıtse-mınıstr Mádına Júnisbekovanyń sózine qaraǵanda, ınflıatsııanyń deńgeıi 7,8 protsent bolǵan. Atalǵan kórsetkishti tómendetýge qatysty josparlar bar. "Bıyl biz 2025 jylǵa deıingi strategııalyq jospardy qabyldadyq. Budan bólek, basqa da josparlar maquldanady. 2025 jylǵa deıin ınflıatsııanyń deńgeıi 3-4 protsenttiń aınalasynda bolady degen josparymyz bar", - deıdi M.Júnisbekova.
