Sheteldik ınvestorlarǵa jeńildikter qarastyrylǵan Qazaqstan zańy keler jyly kúshine enedi

ASTANA. QazAqparat - Sheteldik ınvestorlarǵa jeńildikter qarastyrylǵan Qazaqstan zańy keler jyly kúshine enedi. Bul týraly búgin «Sheteldik jumys kúshin tartý salasyndaǵy zańnamany jetildirý» taqyrybynda ótken dóńgelek ústel barysynda QR Eńbek jáne halyqty áleýmettik qorǵaý mınıstri Tamara Dúısenova málim etti.

«Ózderińiz biletindeı, qazirgi ýaqytta Qazaqstan eldegi ınvestıtsııalyq ahýaldy jaqsartý baǵytyndaǵy jumystardy qolǵa alýda. Bul sheteldik ınvestorlarmen qatar otandyq ınvestorlarǵa da qatysty. Osyǵan baılanysty Qazaqstan Úkimetimen kóshi-qon saıasaty zańnamasyn jetildirýge baǵyttalǵan tujyrymdama ázirlendi», - dedi ol. Mınıstrdiń atap ótýinshe, taıaýda el Úkimeti sheteldik ınvestorlar úshin birqatar jeńildikter qarastyrylǵan QR kóshi-qon zańnamasyn jetildirý tujyrymdamasyn Parlament qaraýyna engizgen. Onda sheteldik ınvestorlardy korporatıvtik tabys salyǵynan, jer, múlik salyǵynan bosatý, kúrdeli shyǵystarynyń bir bóligin óteý qarastyrylǵan. Sonymen birge turaqty salyq, ekologııalyq alym men tólemder stavkasyn, bir tereze qaǵıdasyn engizý kózdelgen. «Menińshe, osy jyldyń ishinde zań jobasy qabyldanatyn bolady. Al kelesi jyldyń basynan bul zań jumys isteı bastaıdy», - dedi T.Dúısenova.