Sheteldik ınvestorlardyń qatysýymen daýlardy qaraıtyn derbes sot qurý máselesi qarastyrylýda

ASTANA. QazAqparat - Memleket basshysy Nursultan Nazarbaev 2014 jylǵy 11 qarashada óziniń kezekti «Nurly jol - bolashaqqa bastar jol» atty Joldaýynda álemdik ekonomıka damýynyń qazirgi ahýalyna sholý jasap, Qazaqstannyń jańa ekonomıkalyq saıasatyn jarııalap, taıaý keleshekke baǵyttalǵan negizgi basymdyqtardy aıqyndap berdi.

Osy oraıda, sot júıesiniń úılesimdi jumysy azamattardyń memlekettik ınstıtýttarǵa degen senimin arttyrýǵa yqpal etetin negizgi faktor bolyp tabylady. Qazirgi ekonomıkalyq jaǵdaıda sot júıesiniń aldynda kásipkerlik sýbektileri qatysatyn sot isteriniń qaralýyn jedeldetý, sot óndirisin jeńildetý jáne tóreshildik rásimderdi azaıtý mańyzdy bolyp tabylady. Osyǵan baılanysty Joǵarǵy Sot óz quzyretiniń aıasynda elimizdiń biryńǵaı ınvestıtsııalyq saıasatyn iske asyrý jónindegi júıeli sharalardy qabyldaýda. Qoldanystaǵy zańnama negizinde bıznestiń múddesin sotta laıyqty qorǵaýdy júzege asyrý maqsatynda mamandandyrylǵan ekonomıkalyq sottarda qaralatyn isterdiń sapasyn barynsha arttyrýǵa zor mán berilgen.

Qazirgi kezde sheteldik ınvestorlardyń qatysýymen daýlardy qaraıtyn derbes sot qurý máselesi qarastyrylýda. Ony Joǵarǵy Sottyń mamandandyrylǵan alqasy retinde qurý joly da talqylanýda. Bul daýlardy neǵurlym joǵary deńgeıde sheshýge jáne jergilikti bılik organdarynyń sotqa yqpal etýiniń áleýetti múmkindigin boldyrmaýǵa múmkindik beredi.

Sonymen qatar, Joǵarǵy Sot Ulttyq kásipkerler palatasymen birlesip, «Tórelik sot týraly» zań jobasyn ázirleýge de belsendi túrde qatysýda.

Búkilálemdik bankpen ózara yntymaqtastyq sheńberinde sot ádildigin ınstıtýtsıonaldyq turǵydan nyǵaıtýǵa baǵyttalǵan baǵdarlamalyq qujat bekitildi. Atalǵan joba boıynsha sýdıalardyń biliktiligin arttyrý jáne mamandandyrylǵan ekonomıkalyq sottardyń qyzmetin ońtaılandyrý, osy baǵyttaǵy sot isin júrgizýdiń tetikterin jetildirý boıynsha birqatar naqty sharalardy júzege asyrý josparlanǵan.