Sheteldik ınvestorlardy qandaı salalar qyzyqtyrady
Koronavırýs pandemııasy Qazaqstan ekonomıkasyn 2,6% deńgeıinde tómendetti. Áıtse de búkil álemdegi iri derjavalardyń ekonomıkasyna qaraǵanda bul kórsetkish sonshalyqty quldyraý emes. Máselen, Halyqaralyq valıýta qorynyń baǵalaýynsha, COVID-19 indetiniń saldarynan jahandyq jalpy ishki ónim 4,4% tómendegen. Atap aıtqanda, AQSh ekonomıkasy 4,3%, Úndistan 10,3%, Japonııa 5,3%, Germanııa 6%, al Reseı 4%-ǵa quldyraǵan.
«Daǵdarystyń el ekonomıkasyna áserin barynsha azaıtý úshin Qazaqstan shıkizattyq emes salalardaǵy ınvestıtsııalyq belsendilikti arttyryp, shynaıy sektordyń ósimin qamtamasyz etti, saýda balansynyń oń saldosyn saqtap, ekonomıkany nesıelendirý kórsetkishin ulǵaıtty. 2020 jyly shynaıy sektordyń ósimi 2% qurap, ekonomıkalyq draıverge aınalǵanyn atap ótý kerek. Shynaıy sektor men qyzmettiń jekelegen túrleriniń barlyǵynda oń ósim baıqalady. Máselen, bul kórsetkish qurylys salasynda 11,2%, aqparat jáne baılanys salasynda 8,6%, aýyl sharýashylyǵynda 5,6%, óńdeý ónerkásibinde 3,9%, bilim salasynda 2,3%-ǵa artqan», - delingen zertteýde.
Jalpy ekonomıkanyń qurylymy da sapaly túrde jaqsaryp qalǵanyn atap ótý kerek. 2020 jyly ónerkásip óndirisiniń jalpy kóleminiń ishinde óńdeý segmenti 39,4%-dan 48,8%-ǵa artty. Jeńil ónerkásipte, avtokólik quraýda jáne daıyn metall buıymdarynyń óndirisinde eki ese ósim baıqalǵan. Óńdelgen jáne daıyn taýarlardyń eksporty da artty. Osylaısha ekonomıkany ártaraptandyryp, shıkizattyq emes sektordyń damytýǵa baǵyttalǵan baǵdar daǵdarystyń teris saldaryn eńserýge kómektesti.
2020 jylǵy qazan aıynyń basyndaǵy merzimge qaraǵanda elde sheteldik ınvestorlardyń qatysýymen shıkizattyq emes salalalarda 200-ge tarta ınvestıtsııalyq joba júzege asyrylyp jatqan. Atap aıtqanda bul jobalar agroónerkásip, taý-ken ónerkásibi, kólik quraý, munaı-gaz hımııasy men hımııalyq ónerkásip salasy, balamaly qýat kózderi, kólik jáne logıstıka salalarynda iske asyrylǵan.
«Qazaqstan ekonomıkasynyń shıkizattyq emes sektoryna sheteldik ınvestıtsııalardy kóbirek tartyp, ınvestorlarǵa ınvestıtsııalyq protsestiń barlyq satysynda qoldaý kórsetý úshin «Astana» Halyqaralyq qarjy ortalyǵynda «Qazaqstannyń ınvestıtsııalyq damý qory» qory jumys isteıdi. Bul rette basymdyqqa ıe ınvestıtsııalyq salalarǵa agroónerkásiptik keshen, ınfraqurylymdyq jobalar (energetıka, kólik, logıstıka, ІT jáne taǵy basqa) jatady. 2020 jyly Qazaqstannyń ınvestıtsııalyq qoryna 103,8 mlrd teńgege deıin kapıtal salynǵan.
2020 jylǵy 17 qarashada Sheteldik ınvestorlardyń keńesinde Memleket basshysy básekege qabiletti salalardy ataǵan edi. Olardyń ishinde ІT salasyna aldaǵy 5 jylda 500 mlrd teńge tartý kózdelgen. ІT naryǵyn, ınjınırıngti jáne basqa da joǵary tehnologııaly qyzmetterdi damytý eksportqa salmaqty múmkindikterdi ashyp, kásiporyndarǵa sátti túrde ózara básekelesýge jol ashady. Artyqshylyǵy mol taǵy bir sala – farmatsevtıka. 2025 jylǵa deıin Qazaqstan jeke farmóndiristiń úlesin 50%-ǵa deıin arttyrýdy kózdeıdi.
