Sheteldik ınvestorlar salyqtar men aıyppuldardy óz erkimen tólegen jaǵdaıda qylmystyq jaýapkershilikke tartpaýdy ótinýde
ASTANA. QazAqparat - Sheteldik iri ınvestorlar Qazaqstan Prezıdenti Nursultan Nazarbaevqa salyqtar men aıyppuldardy óz erkimen tólegen jaǵdaıda olardy qylmystyq jaýapkershilikke tartpaýdy usyndy.
«Birlesken jumystardyń qorytyndysy boıynsha keńes qaraýyna kelesi usynystardy engizemiz. Birinshiden, salyqtyq buzýshylyqtardy dekrımınalızatsııalaý júrgizý qajet. Naqty aıtqanda, salyqtar men aıyppuldardy óz erkimen tólegen jaǵdaıda qylmystyq jaýapkershilikti alyp tasaý kerek», - dedi QR Prezıdenti janyndaǵy Shetel ınvestorlary keńesiniń jalpy otyrysynda «Qazaqstan shetel ınvestorlary keńesi» qaýymdastyǵynyń basqarma tóraǵasy Ýlf Vokýrkı.
Onyń atap ótýinshe, ınvestor kompanııalardyń laýazymdy tulǵalaryn bolmashy salyqtyq zań buzýshylyqqa baılanysty qylmystyq jaýapkershilikke tartý problemaly másele bolyp otyr. Máselen, basqarma tóraǵasynyń aıtýynsha, 20 myń aılyq eseptik kórsetkishtegi kólemde (shamamen 42 mln teńge) salyqty tólemeý qylmystyq is qozǵaýǵa sebep bolady.
«Kóptegen sheteldik ınvestorlar iri salyq tóleýshi bolyp tabylady jáne esepteýlerdegi kishkene ǵana qatelik shekti mánnen asyp ketetin salyqtyń túspeı qalýyna, sonyń saldarynan avtomatty túrde qylmystyq jaýapkershilikke tartýǵa ákeledi. Bıýdjetke kelgen shyǵyn salyqtar, ósimpuldar men aıyppuldar esebimen tolyq qaıtarylady. Dál osy quqyq buzýshylyqqa bola qosymsha qylmystyq jaýapkershilikke tartý bizdiń oıymyzsha negizsiz», - dedi ol.
Óz kezeginde N.Nazarbaev mundaı usynystar sheteldik ınvestorlar úshin jaǵdaı jasaıtyndyǵyn atap ótti. «Qazaqstan Úkimetine, sáıkesinshe vedomstvolar men mınıstrlikterge bul usynysty tyńǵylyqty qaraýdy tapsyramyn», - dedi QR Prezıdenti.
