Sheteldik ınvestorlar Almatyǵa 22,2 mlrd dollar ınvestıtsııa quıǵan
ALMATY. QazAqparat - Almaty ekonomıkasyna salynǵan sheteldik ınvestıtsııa kólemi bir jylda 24% ósti. Bul týraly búgin qalada ótip jatqan «Almaty Invest» jyl saıynǵy ınvestıtsııalyq forýmynda málim boldy, dep habarlaıdy QazAqparat tilshisi.
Sharaǵa álemniń birqatar elinen 500-ge jýyq delegat qatysýda. Olardyń arasynda belgili saıasatkerler, qazaqstandyq jáne sheteldik bıznes-lıderler, ınvestıtsııalyq korporatsııalardyń, qarjy ınstıtýttarynyń jáne halyqaralyq uıymdardyń basshylary bar.
Almaty qalasynyń ákimi Baýyrjan Baıbek buǵan deıin ótken forýmdar nátıjesinde quny 1 mlrd dollar bolatyn 40-qa jýyq memorandýmǵa qol qoıylǵanyn atap ótti.
Ákimniń aıtýynsha, onyń ishinde quny 400 mln dollar bolatyn 12 joba búginde júzege asyrylǵan.
«Almaty - ekonomıkasynyń kólemi 35 mlrd dollar bolatyn Ortalyq Azııadaǵy damyǵan qalalardyń biri. Memleket basshysy Nursultan Nazarbaevtyń syndarly saıasatynyń arqasynda qalanyń ekonomıkasy 100 ese ósti. Eldiń jalpy ishki óniminiń besten bir bóligin jáne salyqtardyń tórtten birin Almaty berip otyr. Sheteldik kompanııalar qalaǵa ınvestıtsııalardy belsendi quıýda. Sońǵy 10 jylda 22,2 mlrd dollar kóleminde ınvestıtsııa tartyldy, sonyń 3,5 mlrd dollary - sheteldik. Bıyl ınvestıtsııalar kólemi 21% artqan, onyń ishinde sheteldik - 24%», - dedi Baýyrjan Baıbek.
Shahar basshy atap ótkendeı, búginde qala ekonomıkasynyń 86% saýda men qyzmet kórsetý salalaryna tıesili. Munda Qazaqstandaǵy iri kompanııalardyń úshten biri shoǵyrlanǵan.
Sondaı-aq B.Baıbek atap ótkendeı, qala jergilikti reformalardy iske asyrýda jahandyq ustanymdarǵa súıenedi jáne úzdik álemdik tájirıbelerge, sonyń ishinde BUU-nyń Turaqty damý maqsattary men Ekonomıkalyq yqpaldastyq jáne damý uıymynyń standarttaryna baǵdarlanǵan. Atap aıtqanda, BUU Damý baǵdarlamasymen jáne «Systra» frantsýzdyq kompanııasymen birlese kólik reformasy, amerıkandyq IDC kompanııasymen birlese «Smart Almaty» kontseptsııasy júzege asyp keledi.
Búginde Qazaqstandaǵy halyqtyń 10% Almatyda turyp jatyr. Almatyda aglomeratsııa turǵyndaryn qosqanda 3 mln astam adam ómir súredi. Halyqaralyq sarapshylardyń baǵalaýynsha, 2035 jyly halyq sany 2 ese artady. Jýyq aradaǵy 15 jylda bizge ekonomıkanyń ortasha ósimin 5% arttyrý mindeti tur. 700 myńnan asa jumys ornyn ashý qajettigi bar. Keler jyldyń basynda qalany damytýdyń master-josparyn jasaý kózdelgen. Qujat qoǵamdyq baqylaýda bolady. Soǵan baılanysty kez kelgen almatylyq oǵan qatysty pikirin aıta alady.
