Sheteldik eriktiler aýyldaǵy balalarǵa aǵylshyn tilin úıretedi
«Elimizde, ásirese aýyldyq jerlerde aǵylshyn tilin úıretetin mamandar tapshy. Osy oraıda, «Nur Otan» partııasy 2018 jyly «English for zhastar» jobasyn iske qosty. Joba aıaynda aǵylshyn tilin biletin qazaqstandyq jáne sheteldik stýdentterdi volonter retinde shaqyramyz jáne aýyldyq jerdegi balalarǵa sabaq berýdi usynamyz. Sebebi, Almaty men Astanada, iri qalalarda tildik kýrstar jumys isteıdi, repetıtordy tabý ońaı. Aýyl balalarynyń da básekege qabiletti bolyp, sheteldik JOO-da zamanaýı bilim alýy úshin sheteldik eriktilerdi aýylǵa jiberýimiz kerek», - dedi «Nur Otan» partııasynyń ortalyq apparaty Saıası jumys deparatmentiniń dırektory Danat Jýmın.
Onyń aıtýynsha, aldaǵy eki jylda tájirıbelik maqsatta 500 adamdy jobaǵa shaqyrý kózdelgen.
«2018 jyly 150 adamdy shaqyramyz, onyń 50-i - sheteldikter. Qazir Eýropa, AQSh-taǵy uıymdarmen birlesip jumys istep jatyrmyz, suhbattar ótkizýdemiz. Sebebi, balalarǵa kez kelgen adamdy jibere almaımyz, eriktiler aǵylshyn tilinen ǵana emes, pedagogıka salasynan da habardar bolýy tıis. Qazir partııanyń óńirlik fılılardaryna saýal joldadyq, qaı óńirge aǵylshyn tili mamanynyń kóbirek qajet ekenin anyqtaımyz. Bıyl respýblıkanyń 14 óńirine 10 adamnan jiberemiz jáne mamandardyń qalaı jumys isteıtinin baqylap kóremiz», - dedi departament basshysy.
English for zhastar - erikti joba, ıaǵnı Qazaqstanǵa kelgisi kelgen sheteldikterdi jatyn jaımen jáne tamaqpen ǵana qamtamasyz etiledi. Jáne olar óz qarajatyna ushyp kelýi kerek.
«Volonterlyq bolǵandyqtan, olarǵa jalaqy da tólenbeıdi. Biraq, qazirdiń ózinde til muǵalimderin óz úıine jatqyzyp, tegin tamaqtandyrǵysy keletin aýyl turǵyndary kóp. Olar volonterdiń óz balalarymen kóbirek ýaqyt ótkizgenin qalaıdy, tipti arnaıy bólme berýge de daıyn», - dedi Danat Jýmın.
Eriktiler aldaǵy oqý jylynan bastap, Qazastan aýyldarynda sabaq beredi.
«Volonterlyq jumys Batysta jaqsy damyǵan. Olar Azııa, Ortalyq Azııa, Shyǵys elderinde turyp kórgisi keledi, tanymyn keńeıtkisi keledi. Ol jaqtyń halqyna paıdasyn tıgizip, kómekteskisi keledi. Qazirgi ýaqytta 30 sheteldik Qazaqstanǵa kelýge, balalarǵa aǵylshyn tilin úıretýge tilek bildirdi. Olarmen suhbat júrgizdik. Tamyz aıynyń ortasynda jańa oqý jylyna Qazaqstanǵa birinshi top keledi», - dep óz sózin túıindedi Danat Jýmın.
