Sheteldik eńbekshilerge salyq salýdan bıýdjetke jylda 10 mlrd.-qa jýyq teńge túsýi múmkin - E. Dosaev
ASTANA. 27aqpan. QazAqparat - Sheteldik eńbekshilerge salynatyn salyq zańdastyrylsa bıýdjetke jylyna 4-10 mlrd. teńgedeı túsim túsýi múmkin.
Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine eńbek kóshi-qony máseleleri boıynsha ózgerister men tolyqtyrýlar engizý týraly» zań jobasyn talqylaý barysynda Ekonomıka jáne bıýdjettik josparlaý mınıstri Erbolat Dosaev málim etti.
«Qazaqstandaǵy baǵalaý boıynsha jyl saıyn elimizde 100 myńnan 300 myńǵa deıin sheteldikter zańsyz eńbekpen aınalysady. Osyny eskersek, bıýdjetke túsetin soma jylyna 4-10 mlrd. teńge aralyǵyn quraıtyny boljanady», - deıdi Erbolat Dosaev.
Bul rette mınıstr, zań jobasyn ázirleý barysynda jeke tulǵalardyń jumys kúshin tartý jumysynyń uıymdastyrýylynyń jáne rettelýiniń álemdik tájirıbesi zerdelengenin de atap ótti. Onyń aıtýynsha, bundaǵy anaǵurlym ońtaılysy Reseıde engizilgen «eńbek patenti» bolyp tabylady. Al zań jobasy boıynsha Qazaqstanda jeke tulǵalardyń úı sharýashylyǵy men basqa da qyzmetterine eńbek mıgranttaryn tartýdyń tetigi ázirlengen.
«Jalpy, sońǵy eki jylda elimizge kelgen 2 mln.-nan astam sheteldik tirkelgen. Onyń shamamen mıllıonǵa jýyǵy eńbek kóshi-qonynyń donorlary bolyp tabylatyn negizgi elderden, atap aıtqanda, Ózbekstan, Qyrǵyzstan, Tájikstan azamattary bolyp otyr. Bul rette, olardyń bir paıyzdan azy ǵana kelý maqsatyn «eńbek qyzmeti» dep kórsetse, qalǵan 96 paıyzy kelý sebebin «jeke maqsattarǵa baılanysty» dep kórsetken», - E. Dosaev.
