Sheteldik eńbek mıgranttaryn emhanaǵa tirkeý tártibi ózgerdi
15 qyrkúıekte Qazaqstanda dástúrli emhanaǵa tirkeý naýqany bastalady. Shetel azamattary bul múmkindikti paıdalana ala ma, olar emhanaǵa qalaı tirkeledi? Bul saýaldarǵa óńirlik kommýnıkatsııalar qyzmetinde ótken brıfıngide Medıtsınalyq saqtandyrý qorynyń Almaty qalalyq fılıaly dırektory Tileýhan Ábildaev jaýap berdi, dep habarlaıdy QazAqparat tilshisi.
Tileýhan Ábildaevtyń sózine súıensek, kampanııa barysynda qazaqstandyqtarmen birge Eýrazııalyq ekonomıkalyq odaq elderinen kelgen eńbek mıgranttary men olardyń otbasy músheleri de emhanaǵa tirkele alady.
«Bıyl sheteldik eńbek mıgranttaryn emhanaǵa tirkeý tártibi ózgerdi. Endi olar emhanaǵa erikti medıtsınalyq saqtandyrý nemese júktelgen medıtsınalyq saqtandyrý kelisimsharty arqyly ǵana tirkele alady. Bul polıster arqyly olar bastapqy medıtsınalyq-sanıtarlyq kómek qyzmetin paıdalana alady», - dedi fılıal basshysy.Eńbek mıgranttary elektrondy úkimet arqyly tirkele almaıdy. Tirkelý úshin emhana basshysynyń atyna qazaq nemese orys tilinde erkin túrde ótinish jazylady. Ótinishpen birge pasport, erikti nemese júktelgen medıtsınalyq saqtandyrý polısi qosa beriledi.
Elimiz boıynsha atalǵan kelisimsharttardy 7 jeke menshik saqtandyrý kompanııasy arqyly rásimdeýge bolady. Olar: «Intertıch» SK, «Bazel» SK, «Nomad» SK, «Frıdom ınshýrans» SK, «Sentras Inshýrans» SK, «NSK» SK, «Bazel» SK.
«Tirkelgennen keıin eńbek mıgranttary MÁMS paketindegi qyzmetterdi paıdalana alady. Mysaly, qajetti konsýltatıvtik-dıagnostıkalyq qyzmetter, josparly statsıonarlyq kómek, medıtsınalyq ońaltý syndy taǵy da basqa kómek túrleri qoljetimdi bolady», - dedi Tileýhan Ábildaev.Eńbek mıgranttarynyń ózderi MÁMS júıesine jumys berýshi tarapynan jasalǵan jarnalar men aýdarymdar arqyly qatysady. Al, 18 jasqa tolmaǵan balalary memleket tarapynan saqtandyrylsa, olardyń jubaılary (zaıyby) ózin-ózi saqtandyrýshy retinde aldaǵy 12 aıǵa jarna tóleýi qajet.
Esterińizge sala ketsek, Qazaqstanda turaqty turatyn, yqtııarhaty bar sheteldikter el azamattarymen birdeı quqyqtarǵa ıe. Olar emhanaǵa burynǵysha kedergisiz tirkele alady.
Al, Eýrazııalyq Odaqqa kirmeıtin elderdiń azamattary emhanaǵa tirkele almaıdy jáne MÁMS qyzmetin paıdalanbaıdy, medıtsınalyq kómek olarǵa tek aqyly túrde kórsetiledi.
