Sheteldik eńbek mıgranttary esebinen el bıýdjetine 30 mlrd teńgege jýyq qarjy tústi

NUR-SULTAN. QazAqparat – Qazaqstan bıýdjetine 2014 jyldan beri shetelden keletin eńbek mıgranttary esebinen 30 mıllıardqa jýyq teńge tústi. Bul týraly QR Іshki ister mınıstriniń orynbasary Murat Baımuqashev málim etti, dep habarlaıdy QazAqparat tilshisi.

«Ótken jyly Qazaqstanǵa keletin shetel azamattary úshin tirkeý rásimi alynyp tastaldy. Degenmen biz baqylaýdy toqtatqan emespiz. Búginde elge kelgen sheteldik qonaq týraly vıza portaly nemese «e-Qonaq» júıesi arqyly kóshi-qon qyzmeti habar berip otyrady. Sondaı-aq, Qazaqstanda zańsyz eńbek mıgranttarymen kúreste 2014 jyldan bastap engizilgen júıe óz jemisin berip jatyr. ıAǵnı, atalǵan jyldan bastap jeke tulǵalarǵa elimizde jumys isteýge patent berile bastady. Osy jyldar aralyǵynda eńbek mıgranttaryna 2 mln-nan astam patent berildi jáne qaıta uzartyldy. Jáne bıýdjetke 30 mlrd teńgege jýyq salyq tústi», - dedi Murat Baımuqashev QR Parlamenti Májilisinde jasaǵan baıandamasynda.

Onyń aıtýynsha, mınıstrliktiń dittegen maqsaty - qazaqstandyq jáne shetel azamattary quqyǵynyń buzylmaýy.

«Odan bólek, 2017 jyly engizilgen zańnamadaǵy túzetýler shetelden kelgen azmattardy esepke alý men olardyń kóshi-qon protsesine baqylaýdy kúsheıtýge múmkindik berdi. Sol sııaqty halyqtyń ishki qonystanýynyń naqty kórinisine qol jetkizdik. Ol óz kezeginde qala, aýdandardy damytýda obektıvti josparlaýǵa, jolaýshylar tasymaly aǵynyn anyqtaýǵa oń áserin tıgizdi. Jáne densaýlyq saqtaý, bilim berý jáne basqa da halyqqa arnalǵan qyzmetter úshin elimizge qansha adamnyń kelip, ketip jatqany mańyzdy», - deıdi ol.

Buǵan deıin habarlaǵanymyzdaı, búgin QR Parlamenti Májilisiniń zańnama jáne sot-quqyqtyq reforma komıtetinde QR keıbir zańnamalyq aktilerine halyqtyń kóshi-qony salasyndaǵy zańnamany jetildirý máseleleri boıynsha ózgerister men tolyqtyrýlar engizý týraly zań jobasynyń tanystyrylymy ótti.