Sheteldik dıplomattar Qazaqstan Prezıdentiniń saılaýyna daıyndyq barysymen tanysty
Jıynda Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi jahandyq geosaıası syn-qaterlerdi eskere otyryp, aldaǵy kezekten tys saılaý Qazaqstan úshin ǵana mańyzdy emes ekenin atap ótti. Óıtkeni, qazir turaqty jáne órkendep kele jatqan Qazaqstan halyqaralyq qoǵamdastyqtyń múddelerine aıtarlyqtaı dárejede jaýap beredi.
«Elimiz keń aýqymdy jahandyq yntymaqtastyqqa, saýda men dıplomatııaǵa járdemdesýge umtylady», - dep qosty syrtqy saıası vedomstvonyń basshysy.
«Bul jol Qazaqstan úshin tarıhı bolyp tabylady. Sondyqtan biz prezıdenttik jáne parlamenttik saılaýda saılaýshylardyń joǵary qatysýyna úmittenemiz. Bizdiń azamattar ultymyzdyń bolashaǵyn anyqtaýda sheshýshi ról atqarýy kerek», - dedi M.Tileýberdi.
Onyń paıymynsha, táýelsizdiktiń barlyq jyldary Qazaqstan halqy turaqty, gúldengen jáne ınklıýzıvti qoǵam qurý úshin jumys istedi. Bizdiń demokratııalyq quqyǵymyzdy jalpyhalyqtyq daýys berý arqyly júzege asyrý osy ýaqytqa deıin qol jetkizgen jetistikterimizdi nyǵaıtýǵa kómektesedi jáne odan ári ilgerileýge negiz bolady.
Ortalyq saılaý komıssııasynyń tóraǵasy Nurlan Ábdirov prezıdenttik saılaýdy ótkizýge daıyndyq barysy jáne onyń negizgi rásimdik aspektileri týraly aıtyp berdi.
«Ortalyq saılaý komıssııasy óz jumysyn zańǵa qatań sáıkes júrgizedi, ashyqtyq pen jarııa dıalog qaǵıdattarynda áreket etedi. Aǵymdaǵy saılaý naýqany «Qazaqstan Respýblıkasyndaǵy saılaý týraly» qoldanystaǵy Konstıtýtsııalyq zańnyń negizinde ótip jatqanyn atap ótý mańyzdy», - dedi N. Ábdirov.
Onyń aıtýynsha, el boıynsha saılaýda barlyǵy 10 101 ýchaske jumys isteıdi, al saılaýshylar tizimine 11 950 485 azamat kiredi. Sondaı-aq, Ortalyq saılaý komıssııasy daýys berýge, onyń ishinde múmkindigi shekteýli adamdarǵa qajetti jaǵdaılar jasaýǵa erekshe nazar aýdarady.
«Halyqaralyq baıqaýshylardy akkredıtteý keshe, 14 qarashada aıaqtaldy. Ortalyq saılaý komıssııasy janynan barlyǵy 641 baıqaýshy akkredıttelgen, onyń ishinde EQYU DIAQB, TMD, TMD PAA, UQShU PA, Túrki memleketteri uıymy, TúrkPA, ShYU, IYU baıqaýshylar mıssııalarynyń ókilderi, sondaı-aq 35 shet memlekettiń ókilderi bar», - dep atap ótti OSK tóraǵasy.
N.Ábdirov dıpkorpýsqa prezıdenttik saılaýdy baıqaýǵa qatysýǵa nıet bildirgeni úshin alǵysyn bildirip, OSK daýys berý rásimderiniń barynsha ashyqtyǵyn, aıqyndyǵyn jáne demokratııalyǵyn qamtamasyz etetinine sendirdi.
Sheteldik dıplomatııalyq mıssııalardyń basshylary Ortalyq saılaý komıssııasy tóraǵasynyń aldaǵy daýys berýdi uıymdastyrýǵa jáne saılaýdy baıqaý protsesine qatysty kóptegen suraqtaryna tolyq jaýap aldy.
Brıfıngke Qazaqstannyń sheteldegi dıplomatııalyq mıssııalarynyń ári EQYU DIAQB jáne TMD-dan Qazaqstandaǵy saılaýdy baıqaý jónindegi mıssııalarynyń basshylary da qatysty.
