Sheteldik dárigerlerdi tańdaǵanda neni bilý qajet
NUR-SULTAN. QazAqparat - Qalalyq qoǵamdyq densaýlyqty qorǵaý departamentiniń basshysy Sadýaqas Baıǵabylov sheteldik mamanǵa qaralmastan buryn ne isteý kerektigin aıtty, dep habarlaıdy QazAqparat tilshisi.
Búgingi kúni elimiz aýmaǵynda shyǵatyn buqaralyq aqparat quraldary men ınternet-resýrstarda sheteldik dárigerlerdiń medıtsınalyq qyzmet kórsetetindigi jaıly habarlandyrýlar jıi jarııalanady.
«Elimizde medıtsınalyq qyzmet kórsetýdi, onyń ishinde keńes berýdi josparlanǵan barlyq sheteldik mamandar eń aldymen klınıkalyq tájirıbege ruqsat etilgendigi týraly sertıfıkat alýy tıis. Osydan keıin ǵana sheteldik dáriger zańdy túrde Qazaqstan aýmaǵynda medıtsınalyq qyzmetine kirise alady. Degenmen, qazirgi ýaqytta elimizdegi birqatar medıtsınalyq uıymda, onyń ishinde jekemenshik klınıkalarda sheteldik mamandar medıtsınalyq qyzmetpen aınalysýǵa ruqsat almastan «jasyryn» medıtsınalyq qyzmet kórsetedi», - dedi ol.
Onyń atap ótýinshe, mundaı «jasyryn» medıtsına mamandarynyń qyzmetine júginetin turǵyndar ózderiniń densaýlyqtaryn qaýip týdyrady. Sebebi «bir kúndik» sheteldik mamandar bir qaladan ekinshisine «kóship» júredi.
«Sapasyz medıtsınalyq kómek kórsetilgen nemese densaýlyǵyna zııan kelgen jaǵdaıda turǵyn oǵan qaıta júgine de, shyǵynyn óteı de almaıdy. Sebebi olar bul ýaqytta basqa óńirde júredi ne Qazaqstannan tysqary shyǵyp ketedi. Al «jasyryn» sheteldik dárigerdiń «qateligin» túzeý, ońaltý protsedýrasy otandyq dárigerlerdiń ıyǵyna artylady», - dedi departament basshysy.
Osy rette ol elordalyq turǵyndarǵa sheteldik dárigerge qaralmastan buryn onyń el aýmaǵynda medıtsınalyq qyzmet kórsetýge sertıfıkatynyń bar-joǵyn tekserýge keńes beredi.
«Osyǵan oraı, elorda turǵyndaryn sheteldik dárigerdiń jazylýyna jazylmas buryn olarda mamannyń klınıkalyq tájirıbeni júzege asyrýy úshin sertıfıkaty bar-joǵyn suraýǵa shaqyramyz. Sertıfıkat 5 jylǵa beredi jáne Qazaqstan aýmaǵyna jaramdy bolady. Departament 2018 jyly sheteldik mamandarǵa 33, al jyl basynan beri 10 sertıfıkat berdi. Sheteldik dárigerlerdi tańdaýda abaı bolyńyzdar», - dedi Sadýaqas Baıǵabylov.
