Sheteldik baspanyń Qazaqstan týraly kitaby bestseller qatarynda endi

NUR-SULTAN. QazAqparat – Halyqaralyq tanymal Springer baspasynan shyqqan Ortalyq Azııadaǵy, onyń ishinde Qazaqstandaǵy bilim berý reformasy týraly kitap eń kóp satylǵan 100 kitap qatarynan tabyldy, dep habarlaıdy QazAqparat.

Aǵylshyn tilindegi «Ortalyq Azııadaǵy bilim berý: syn-qaterler men múmkindikter kaleıdoskopy» kitaby akademııalyq jýrnaldar men kitaptar shyǵaratyn sheteldik baspadan 2020 jyly jaryq kórgen.

Ortalyq Azııadaǵy bes eldiń bilim salasyndaǵy reformalary men olardyń tıimdiligine qatysty zertteýler sheteldik ǵalymdar úshin asa paıdaly ádebıetke aınalǵan. Buǵan shamamen 100 eýro turatyn kitapty 2 myńǵa jýyq oqyrmannyń satyp alýy dálel. Sheteldik baspa atalǵan kitaptan 85 mıllıon teńgege jýyq paıda tapqan.

Qazaqstannyń bilim berý salasyna arnalǵan bóliminiń avtory – ǵalym, Q.Jubanov atyndaǵy Aqtóbe óńirlik ýnıversıtetiniń rektory Laýra Qarabasova. Zertteý jumysy Qazaqstandaǵy úshtildi bilim berý reformasyna arnalǵan. Avtor Qazaqstandaǵy úshtildi bilim berý saıasaty tolyǵymen qoldaý tapqanymen, el úkimeti baǵdarlamanyń tujyrymdamasyn, naqty talaptaryn barlyq aýdıtorııaǵa birdeı jetkize almaǵanyn aıtady.

Jaqynda Oqý-aǵartý mınıstrligi zertteýler men saraptamalar negizinde birinshi synyp oqýshysyna birden úsh tildi úırený qıyn ekenin eskerip, memlekettik tildegi birinshi synyptarda balalar tek qazaq tilin, orys tilinde oqytatyn synyptarda – memlekettik jáne orys tilderin oqıtynyn málimdegen edi. Al orys tili ekinshi synyptan jáne aǵylshyn tili barlyq mektepterde úshinshi synyptan bastalatynyn habarlaǵan bolatyn.