Sheteldik bankter Qazaqstanda óz fılıalyn asha alady
ALMATY. QazAqpart- Sheteldik bankter Qazaqstanda «bir ótinish» qaǵıdaty boıynsha óz fılıaldaryn asha alady, dep habarlaıdy QazAqparat tilshisi.
Dúnıejúzilik saýda uıymyna kirý kezinde qabyldanǵan mindettemelerdi iske asyrý aıasynda 2020 jyldyń 16 jeltoqsannan bastap Qazaqstan Respýblıkasynyń aýmaǵynda sheteldik bankterdiń, saqtandyrý (qaıta saqtandyrý) uıymdarynyń jáne saqtandyrý brokerleriniń fılıaldaryn ashýǵa ruqsat berildi.
Qazaqstan Respýblıkasynyń aýmaǵynda qyzmetin bastaý úshin sheteldik qarjy uıymy QR Qarjy naryǵyn retteý jáne damytý agenttiginde fılıal ashýǵa ruqsat alýǵa tıis, odan keıin fılıal Agenttiktiń tıisti lıtsenzııasyn alady.
Sheteldik qarjy uıymyna fılıal ashý jáne qyzmetin bastaý úshin mynadaı talaptar qoıylatyn bolady:
rezıdenttik eliniń aýmaǵynda banktiń nemese saqtandyrý (qaıta saqtandyrý) qyzmetin júzege asyrýǵa qoldanystaǵy lıtsenzııasy bar;
fılıal tarapynan mindettemeler oryndalmaǵan jaǵdaılarda, mindettemelerdi sózsiz jáne dereý oryndaý týraly jazbasha mindetteme usyndy;
sheteldik bank aktıvteriniń eń az kólemi 20 mlrd AQSh dollaryn quraıdy;
sheteldik saqtandyrý (qaıta saqtandyrý) uıymy aktıvteriniń eń az kólemi 5 mlrd AQSh dollaryn quraıdy, bul rette jumys tájirıbesi 10 jyldan kem bolmaýǵa tıis.
Sheteldik uıym fılıaldarynyń basshy qyzmetkerleri retinde taǵaıyndalatyn kandıdattar úshin – joǵary bilimniń, iskerlik bedeliniń minsiz (ótelmegen nemese alynbaǵan sottylyǵynyń bolmaýy), halyqaralyq qarjy uıymdaryndaǵy eńbek ótiliniń bolýy mindetti.
Bul rette sheteldik qarjy uıymynyń fılıaly basshy qyzmetkerleriniń quramynda QR keminde 2 azamaty bolýǵa tıis. Sheteldik bankterdiń, saqtandyrý (qaıta saqtandyrý) uıymdarynyń jáne saqtandyrý brokerleriniń fılıaldary úshin de qazaqstandyq qarjy uıymdaryna qatysty qoldanylatyn retteý talaptary qoldanylady.
Osyǵan baılanysty sheteldik qarjy uıymdarynyń fılıaldary prýdentsııalyq normatıvterdiń jáne bankter men saqtandyrý uıymdaryna qoıylatyn saqtalýy mindetti ózge de talaptardyń tolyq tizbesin saqtaýǵa tıis.
