Sheteldik BAQ ókilderi ońtústiktiń kıeli jerlerin aralady
ShYMKENT. QazAqparat - Ońtústik Qazaqstan oblysyna arnaıy is-saparmen kelgen sheteldik BAQ ókilderi kıeli jerlerdi aralap, qazaqtyń tarıhymen tanysty, dep habarlaıdy QazAqparat tilshisi.
Aldymen túrki áleminiń rýhanı ortalyǵyna kelgen qonaqtar ulylar mekeni sanalatyn Túrkistan shaharyn kózben kórip, Q.A. ıAsaýı kesenesin aralady. AQSh, Italııa, Ulybrıtanııa, Egıpet, Ispanııa, Japonııa, Brazılııa, Ońtústik Koreıa, Kanada, Avstralııa, Indonezııa, Frantsııa, Avstrııa, Qytaı Halyq Respýblıkasy jáne Ońtústik Afrıka elderinen jınalǵan jýrnalıster sonymen qatar keseneniń aýmaǵyndaǵy tarıhı oryndardy tamashalap, erekshe əserlerimen bólisti. Syry men tarıhy tunǵan kıeli orynnyń qoryq-mýzeı qyzmetkeri olarǵa ekskýrsııa júrgizdi.
Álemdik BAQ ókilderiniń arasynda álemge áıgili AQSh-tyń «Forbes» jáne «Frılanser», Italııanyń IA «INTERRIS», Ispanııanyń «ElCultural» jýrnaldarynyń, Ońtústik Koreıanyń «JoongangIlbo» gazetiniń, Egıpet «Nıl-Kýltýra» jáne «OnTV» kanaldarynyń da tilshileri bar saıahatshylar keıinnen Otyrar aýdanyna saparlady.
Aýdan ákimdiginiń qyzmetkerleri olardy «Qobyz ben Dombyra» kesheni janynan kútip alyp, qurmet kórsetti. Munan soń qonaqtar «Arystanbab» kesenesine baryp zııarat jasady. Aty álemge áıgili bolǵan «Ejelgi Otyrar» qalasynyń kóne tarıhy sheteldik jýrnalısterdiń qyzyǵýshylyǵyn oıatty. Kezinde Mysyrdy bılegen sultan Beıbarys pen álemniń ekinshi ustazy sanalǵan Ábý Nasyr ál-Farabıdiń otany kim-kimdi bolmasyn oısyz qaldyrmasy anyq.
Keseneni aralaý barysynda sheteldikter Otyrardyń tereńnen syr shertetin baı murasyna qanyqty. Álemniń 15 elinen kelgen tilshiler arnaıy jaıylǵan dastarhannan dám tatyp, qazaqtyń ulttyq taǵamdary qurt, qazy-qarta, shubat jáne taǵy da basqa aspen tanysty. Olarǵa otyrarlyq ónerpazdar uly sazger Shámshi Qaldaıaqovtyń ánderin shyrqap, kóterińki kóńil-kúı syılady.
