Sheteldik avtorlardyń jýrnalıstıka men PR salasyndaǵy eńbekterin qazaq tiline aýdarý jobasy bastaldy

ASTANA. QazAqparat - Aqparat jáne kommýnıkatsııalar mınıstrligi sheteldik avtorlardyń jýrnalıstıka men PR salasyndaǵy irgeli eńbekterin túpnusqadan qazaq tiline aýdarý jobasyn bastady. Bul týraly Dáýren Abaev Feısbýktegi paraqshasynda jazdy.

"Qymbatty dostar!

Jalpy, elimizde mundaı jınaqtarǵa suranys úlken bolǵanymen, kópshiligi orys tilinde ekeni jasyryn emes. Al, qazaq tilindegi oqýlyq az.

Mine, sondyqtan biz osy isti qolǵa aldyq. Árıne, bul birshama ýaqyt pen eńbekti talap etedi. Birinshiden, ol suranysqa ıe, ýaqyt ótse de ózektiligin joǵaltpaıtyn kitap bolýy shart. Ekinshiden, avtorlyq quqyq ıesinen ruqsat alý, sapaly aýdarý isi de ońaı emes. Degenmen biz alǵashqy jınaqty qyrkúıektiń 1-de stýdentterdiń qolyna tıgizýdi josparlap otyrmyz.

Osy maqsatta biz aldymen ýnıversıtetter oqytýshylarynyń keńesimen kitaptar tizimin jasadyq. Búgin mine, solardyń ishinen qazaqshaǵa aýdarylatyn birinshi kitap ta anyqtaldy.

Sonymen, alǵashqysy osy salanyń bilikti mamandary - Lı Enn Pek pen Gaı S. Rıldiń qyzmet barysyndaǵy BAQ etıkasyna arnalǵan «Media Ethics at Work» jınaǵy bolmaq. Bul  shetelderde stýdentterdiń úlken suranysyna ıe irgeli eńbek. Aıta ketý kerek, bul jınaq orys tilinde jaryq kórmegen, ıaǵnı qazaqshaǵa tikeleı túpnusqadan aýdarylady.

Aldaǵy ýaqytta ony 3000 danamen shyǵaryp, elimizdegi barlyq kitaphana men oqý oryndaryna taratýdy kózdep otyrmyz.

Bolashaqta osy isti demeýshiler arqyly júıeli túrde jalǵastyryp, jyl saıyn birneshe kitapty aýdaryp otyrý josparda bar. Bul óz kezeginde, jas jýrnalısterimizge aqparat salasyndaǵy álemdik damý tendentsııalarymen keńinen tanysýǵa múmkindik berip, otandyq jýrnalıstıkaǵa oń ózgerister alyp keledi dep oılaımyz.

Sonymen qatar, bul jobany memlekettik tildiń órisin keńeıtýge baǵyttalǵan naqty sharalardyń biri dep aıtýǵa bolady», delingen Aqparat jáne kommýnıkatsııalar mınıstriniń jazbasynda.