Sheteldik áýe kompanııalaryna qoıylatyn talaptar qatańdaıtyn bolady
ASTANA. QazAqparat - Investıtsııa jáne damý mınıstrligi Azamattyq avıatsııa komıteti sheteldik áýe kompanııalaryna qoıylatyn talaptardy qatańdatý jumystaryn jalǵastyrýdy josparlap otyr.
Bul týraly búgin jýrnalıstermen ótken brıfıng barysynda Investıtsııa jáne damý mınıstrligi Azamattyq avıatsııa komıteti tóraǵasynyń orynbasary Serik Muhtybaev málim etti.
Tóraǵa orynbasarynyń aıtýynsha, 2013 jyldan beri sheteldik áýe kompanııalaryna qoıylatyn talaptardy kúsheıtý baǵytynda zańnamaǵa 80-nen astam túzetý engizilgen. Sonyń nátıjesinde kóptegen áýe kompanııalary qyzmetin toqtatsa, endi biriniń lıtsenzııasy qaıtaryp alyndy. «Biz bul jumysty júıeli túrde jalǵastyrýdy josparlap otyrmyz», - dedi Serik Muhtybaev brıfıngte.
Eske sala ketetin jaıt, buǵan deıin Eýropalyq komıssııa óziniń resmı saıtynda «Eır Astana» áýe kompanııasynan basqa qazaqstandyq kompanııalarǵa eýropaǵa ushýlarǵa tyıym salatyndyǵy týraly aqparat jarııalanǵan bolatyn. «Qara tizimge» qazaqstandyq kompanııalardyń enýine basty sebep - aýdıttiń halyqaralyq standarttarǵa sáıkes emestiginde bolyp otyr.
«Qazaqstandyq «SKAT» áýe kompanııasy IOSA aýdıtinen ótý úderisterin aıaqtady. Bul aýdıtte shamamen 800-ge tarta parametrler qamtylǵan. Al «Eır Astana» ony birneshe márte ótken bolatyn», - deıdi S. Muhtybaev.
