Sheteldik áskerıler Qazaqstan armııasyna ınspektsııa júrgizýde (FOTO)
ASTANA. QazAqparat - QR Qarýly Kúshterinde Kanadanyń áskerı qyzmetshileri «kórsetilgen aýdandy» ınspektsııalaýdy júrgizýde. Tekseriske Aqmola jáne Qaraǵandy garnızondarynda ornalasqan bólimder jatady. Ol Astana qalasynda bastaý aldy, dep habarlaıdy Qorǵanys mınıstrliginiń baspasóz qyzmeti.
Kanadanyń áskerı qyzmetshileri ınspektsııany áýe jáne jerústi tásildermen ótkizedi. Ol úshin áskerı-kóliktik tikushaq jáne avtokólik tartyldy. «Inspektsııanyń maqsaty - habardar etiletin áskerı qyzmettiń, ıaǵnı, armııa deńgeıinde áskerı oqý-jattyǵýdyń bolýy nemese bolmaýy faktisin tekserý. Ol «Senimdilik pen qaýipsizdikti nyǵaıtý sharalary jónindegi 2011 jylǵy Vena qujatynyń» erejelerine sáıkes ótkiziledi», - dep QR QM Qarý-jaraqty baqylaý jáne ınspektsııany qamtamasyz etý jónindegi ortalyqtyń áskerı qyzmetshileri atap ótti.
Odan basqa, Italııa men Lıtva ókilderiniń qatysýymen AQSh-ty baǵalaý jónindegi top Qazaqstan aýmaǵynda baǵalaý jónindegi sapardy ótkizýdi bastady. Sheteldik áskerı qyzmetshiler jeke quramnyń, jyl saıynǵy áskerı aqparat almasý sheńberinde Qazaqstan Respýblıkasy usynatyn qarý-jaraq pen áskerı tehnıkanyń negizgi júıeleriniń sany týraly derekterdi baǵalaıdy. Baǵa berý boıynsha sapar shegý nysany retinde Taldyqorǵan qalasyndaǵy desanttyq-shabýyldaý brıgadasy tańdaldy. «Mundaı saparlar ózderiniń ulttyq aýmaqtarynda sheteldik áskerı ınspektsııalardy qabyldaý EQYU kez kelgen qatysýshy memleketiniń mindettemeleri týraly Vena qujatyna sáıkes ótkiziledi», - dep ortalyqta habarlady. EQYU áskerı-saıası ólshem sheńberinde is-sharalardy oryndaý EQYU-da Qazaqstan qyzmetiniń basymdyq baǵyttarynyń biri bolyp tabylatynyn aıta keteıik. 
