Sheteldik áskerı oqý oryndaryna qujat qabyldaý tamyzda bastalady

NUR-SULTAN. QazAqparat – Qorǵanys mınıstrliginiń ókilderi Qazaqstannyń áskerı qorǵanys mamandary qaı elderde bilim alyp júrgenin aıtty, dep habarlaıdy QazAqparat.

Qorǵanys mınıstriniń orynbasary Tımýr Dándibaevtyń aıtýynsha, negizgi mamandyqtardyń kóbi Qazaqstannyń ózinde daıyndalady.

Shetelde tek sırek ári tapshy mamandyq ıelerin oqytý jolǵa qoıylǵan.

«Negizinde kóptegen mamandyqtardy ózimizde daıyndaımyz. Biraq bir erekshe bir tizim bar. Asa tapshy mamandyqtar boıynsha shetelge jiberýge májbúrmiz. Kıberqaýipsizdik, gıdrografııa, ınjenerlik-saperlik, áýe shabýylyna qarsy kúres mamandyqtary boıynsha mamandardy shetelde daıyndaý baǵytynda jumys istep jatyrmyz», - dedi Tımýr Dándibaev.

Áskerı bilim jáne ǵylym departamentiniń bastyǵy Talǵat Qalıshevtiń aıtýynsha, atalǵan mamandyqty meńgerýshiler kóbine irgeles memleketterdi tańdaıdy.

«Qazirgi ýaqytta Reseı Federatsııasynda, Belarýs, Armenııa, Qytaı, Túrkııa, AQSh, Úndistan, Pákistan jáne basqa da elderde Qazaqstannyń azamattary áskerı bilim alyp jatyr. Ol oqý oryndaryna túsý úshin Qorǵanys mınıstriniń №371 buıryǵy bar. Bıylǵy qabyldaý merzimi tamyz aıynda bolatynyn aıtqym keledi», - dedi Talǵat Qalıshev.